Dialogo nacional di gobierno ta haya critica: “Mas presentacion cu consulta”

ORANJESTAD – Manera ta conoci, gobierno actual di Aruba a activa   su plataforma di “dialogo nacional” cu gremionan comercial y sindical atrobe — un instrumento cu precisamente e gabinete actual a introduci como metodo di consulta structural cu sector social y economico.

MANTENE PARTIDONAN INFORMA

Segun gobierno, e dialogonan tin como meta mantene sector informa riba politica y decision importante, y crea espacio pa intercambio di punto di bista. Pero den varios gremio ta crece duda si e proceso realmente ta conduci na influencia real riba politica, of si e ta mas bien un canal di comunicacion di un solo direccion for di gobierno.

PERCEPCION DI CONSULTA LIMITA

Representantenan di sector comercial y sindical, cu ta participa den e reunionnan, ta indica cu hopi biaha e informacion presenta ya ta refleha decision cu gobierno a forma anteriormente. Den e contexto ey, dialogo ta wordo percibi como splicacion posterior, envez di consulta previo.

Un participante a describi e formato como “un presentacion cu espacio pa reaccion, pero no necesariamente pa cambia rumbo.”

E percepcion aki ta pone e pregunta riba efectividad di e instrumento cu gobierno actual a posiciona como pilar di gobernacion participativo.

INSTRUMENTO PROPIO DI GABINETE ACTUAL

Diferente di reunion sectorial tradicional cu a existi anteriormente, e asina yamado dialogo nacional ta wordo presenta explicitamente door di gobierno actual como mecanismo structural di consulta amplio cu gremionan. Esaki ta haci cu evaluacion di su impacto ta wordo liga directamente na e estilo di gobernacion di e gabinete aki mes.

META: INFORMACION Y ESTABILIDAD

Gobierno ta mantene cu e dialogonan tin balor principalmente den mantene sector informa, y preveni malentendimento riba medidanan economico y social. Den un economia chikito manera Aruba, consulta regular cu gremionan por contribui na stabilidad social y clima economico predecibel, segun e splicacion oficial.

Pero e cuestion cu ta surgi den e sectornan, mas y mas, ta si e informacion solamente ta suficiente pa yama e proceso un “dialogo” real. 

RESULTADO AINDA NO CLA

Te awor, tin algun ehempel, aunke no hopi concreto ampliamente reconoci unda posicion di gremio den dialogo nacional a resulta den ahuste substancial di politica gobierno. Esaki ta alimenta e percepcion cu e plataforma ta sirbi mas como vehiculo di splicacion di decision cu ya ta forma, enbez di espacio unda politica ta wordo co-crea. 

DEBATE RIBA EFECTIVIDAD

Cu gobierno actual a continua pa activa e dialogo nacional, debate riba su efectividad ta bira mas visibel. Pa gremionan, e pregunta central ta si participacion di nan ta tin peso real riba direccion di politica.

Pa gobierno, reto ta demostra cu e instrumento cu nan a crea ta produci influencia bilateral, no solamente intercambio informativo.

Mientras dialogo nacional ta sigui como practica di consulta di e gabinete actual, evaluacion di su impacto real riba decision politico ta keda un punto di discusion entre gobierno y sector social y economico di pais.