Keto keto Hulanda a dicidi riba un AMvRB pa St Maarten

DEN HAAG – Keto keto, gobierno di Reino hulandes a anuncia cu St Maarten lo haya su proximo Maatregel van Rijksbestuur (AMvRB) nobo, pa asina forza e isla cumpli cu e protocol riba supervision di integridad. Asina e matutino di Corsou Antiliaans Dagblad ta raporta. E matutino ta cita vocero di Raad van State cu a confirma cu un peticion pa conseho pa un AMvRB nobo a wordo entrega. Esey a sosode riba dia 22 di juli ultimo sin cu ningun publicidad a wordo duna na dje. Pero danki na investigacion di e matutino, e informacion a sali na cla.

AMvRB ANTERIOR

Tabata na juni ultimo cu un AMvRB anterior a wordo revoca, ora cu Hulanda y St Maarten a yega na un acuerdo riba 23 di mei riba e tema. A acorda cu prome cu 1 di juli, lo tabatin un landsverordening Integriteitskamer pasa den parlamento di e isla y firma pa gobernador. Pero despues cu e deadline ey a vence, tabata visto cu pa e proximo conseho di minister di Reino di dia 10 di juli, St Maarten lo a haya e medida. Pero na final, a dicidi cu no ta hacie esey pasobra partidonan a duna indicacion cu cosnan tabata ‘canando atrobe’. A sali e ora for di e punto di bista cu lo a dicidi atrobe ora cu e proximo conseho di minister di Reino tuma lugar dia 4 di september proximo. Pero investigacion di e matutino menciona, a dicidi prome caba pa duna e isla un AMvRB. Awor tin cu warda ki ora e decision ta cay cu ta otorga St Maarten su medida nobo. Tanto BZK (ministerio di asuntonan interior) como otro instancianan ta keto riba e topico aki. fuente Antiliaans Dagblad. www.antiliaansdagblad.com