Tripadvisor Travellers’ Choice Awards 2026: Eagle Beach scogi e beach numero 1 den Caribe

ORANJESTAD - Aruba ta orguyoso di anuncia cu a wordo reconoci den e Tripadvisor Travelers’ Choice® Awards manera “Best of the Best” pa 2026, clasificando entre e mihor destinonan di beach tanto regional como mundialmente. E nivel mas halto di Tripadvisor, Best of the Best, ta inclui e top 1% di tur listingnan mundial riba e plataforma.

Eagle Beach y Palm Beach a wordo nombra entre e mihor beachnan den Tripadvisor Travelers’ Choice Awards 2026. Eagle Beach ta rankea numero 1 den Caribe y numero 4 den mundo. Palm Beach, cu no tabata riba e lista di 2025, ta ocupa e puesto numero 6 den Caribe. E Travellers’ Choice Awards Best of the Best ta representa e honor mas halto di Tripadvisor, paso cu e ta reconoci e mihor lugarnan pa bishita no pa medio di un hurado, sino door di e biaheronan mes: esnan cu a experencia e destino personalmente.