Sonja Velthuizen ta reemplaza Leo Maduro na Camara di Comercio

ORANJESTAD - Recientemente KvK a despedi di Sr. Leo Maduro como secretario di e institucion. Sr. Maduro merecidamente ta bay disfruta di su pensioen despues di 10 aña den servicio di KvK. Sr. Maduro a inicia su carera na KvK como beleidsmedewerker y e ultimo 4 aña, Sr. Maduro a fungi como secretario di KvK. Sra. Sonja Velthuizen, kende ta hoofd di Business Information & Support a keda nombra como secretario suplente.

MAS CAMBIO

Den KvK su hunta di directiva tambe tin algun cambio. Despues di 10 aña como miembro di directiva, Sr. Robert Carrasquero a tuma su retiro y na su luga Sr. Serge Mansur a join e directiva di KvK na Juni ultimo. E nombramento di Sr. Mansur a bay segun e reglamento di admision na e directiva di KvK. Sr Carrasquero tabata tambe vice-presidente di e hunta di directiva y na su luga Julisa Arends-Hoevertsz a wordo eligi como vice-presidente pa aña 2015.

ELECCION PARCIAL

Tur aña KvK ta tene eleccion parcial di directiva, segun un schedule fiho. Cada aña un parti di e directiva di KvK ta baha, segun un sistema rotativo unda cada bes tres di e nuebe puestonan ta bira vacante. Esaki ta duna oportunidad pa miembro nobo drenta pa contribui na trabao di KvK, pero di otro banda manteniendo continuidad den directiva. Riba 31 di december 2015 atrobe 3 miembro di e hunta di directiva lo baha pero conforme e stipulacionnan den Ordenanza di Eleccion di KvK ta permisibel pa miembro cu ta baha pone nan mes reeligibel. Den e lunanan cu ta bin KvK lo publica e fechanan cu candidatonan por postula nan mes pa un asiento den e hunta di directiva di KvK.