ANALISIS: Legalizacion masivo sin expansion di capacidad ta satura Censo

Scirbi pa Tito Laclé

Recientemente gobierno a introduci un proyecto pa legalisa un cantidad grandi di persona indocumenta na Aruba. E medida, cu di un banda, tin implicacion humano y social importante, a provoca un aumento rapido den e cantidad di inscripcion na Censo. Segun Director di Censo mes a splica repetidamente publicamente cu si bo habri e benta sin aumenta e capacidad di e sistema completo, lo yega un momento cu simpelmente “no tin lugar pa tanto hende” — manera e dicho popular ta bisa: no tin cama pa tanta gente.

CAPACIDAD CONTRA DECISION POLITICO

E cuestion central ta directo: si e capacidad anual di Censo pa procesa inscripcion di stranhero tabata rond di 3000 persona pa aña, con e sistema por absorba 7000 permiso nobo den un solo ronda? Mas aun, segun informacion cu mi tin, e refuerzo di personal a bay principalmente na DIMAS (16 persona extra), mientras Censo — cu mester registra, valida y integra tur e dato — no a haya expansion proporcional.

Resultado: un bottleneck administrativo.

No pasobra falta di boluntad, sino falta di capacidad structural.

Director di Censo tabata ‘cla y raspa’ riba e tema. Pero e tabata un advertencia cu, no a haya respuesta suficiente na nivel di coordinacion interdepartamental.

SISTEMA DI CITA: MERCADO PARALELO?

Un otro dimension preocupante ta e alegacion cu tramitadornan di permiso ta manipula e sistema di cita online. Segun varios fuente, nan (e tramitadornan) lo ta blokia slot di cita pa despues bende nan na cliente. E practica aki, si ta cierto, no solamente ta anti-etico, sino ta distorciona acceso igual na servicio publico.

Censo, segun cu ta conoci, ta haciendo su maximo pa filtra emailnan sospechoso y blokia patronnan dudoso. Pero e limitacion legal y tecnico di e departamento ta cla: sin denuncia formal of investigacion penal, nan no por actua mas aya.

Director di Censo a indica cu si tin evidencia di benta di cita, e caso por wordo referi na Landsrecherche. E problema? Hende ta papia, pero denuncia formal casi no ta bin. Y sin denuncia, no tin caso.

EFECTO DOMINO RIBA SISTEMA PUBLICO

E situacion actual ta mustra un problema mas grandi cu solamente Censo. Ta revela un falta di sincronisacion den implementacion di politica publico. Legalizacion masivo tin logica social — pero e ejecucion mester ta alinea cu capacidad di:

Censo

DIMAS

Registro Civil

Salud

Vivienda

Educacion

CONCLUSION: POLITICA SIN CAPACIDAD TA CREA FRUSTRACION

E analisis ta mustra un patronchi cla: Decision politico a bay mas lihe cu capacidad administrativo. Resultado ta frustracion pa ciudadano, atraso pa e solicitante legitimo, y sospecho di mercado paralelo rond di servicio publico.

Legalizacion ta un decision soberano di gobierno. Berdad. Pero implementacion eficaz ta depende di planificacion integral. Sin esey, e sistema ta satura — y confianza publico ta sufri.

E pregunta awor ta simpel: Gobierno lo ahusta capacidad di Censo na realidad di e politica cu nan mes a crea? Of lo laga e departamento sigui lucha cu un fluho cu ta supera su limite?

Pasobra, manera Director di Censo a bisa:

si no tin cama pa tanto hende — e sistema lo colapse.