Rey Charles tocante detencion di su ruman Andrew: ‘Ley mester sigui su curso’

LONDON - Rey britanico Charles a declara den un comunicado cu el a tuma nota “cu gran preocupacion” di detencion di su ruman Andrew. E ex-prins a wordo deteni awe mainta riba sospecha di un delito di funcion. “Loke ta sigui awor ta e procedimiento completo, honesto y correcto cu e asunto aki lo wordo investiga di forma apropiá y dor di autoridad competente,” segun Charles. “Manera mi a bisa anteriormente, nan por conta riba nos sosten completo y cooperacion total den esaki.” Mas tempran e luna aki Buckingham Palace a anuncia cu lo colabora cu polis britanico den investigacion tocante Andrew Mountbatten-Windsor. “Laga mi ta cla: ley mester sigui su curso,” Charles a bisa awor. “Mientras e proceso aki ta continua, no lo ta apropiá pa duna mas comentario riba e asunto. Entretanto, mi famia y mi lo continua cumpli cu nos deber y servicio na boso tur.” Ni rey Charles ni Buckingham Palace no tabata informa di antemano tocante detencion di Andrew Mountbatten-Windsor, segun emisora britanico BBC.