MEP y minister den tangana pa contesta riba uso di ‘avion priva’

ORANJESTAD – Fraccion di MEP diaranson a duna minister Gerlien Croes pa contesta ‘kico no ta bon’ den e peticion di e partido heel rond di e asunto di pago di avion priva. Un deadline cu MEP a pone pa e minister pa e entrega contesta riba e ‘escandalo di jet priva’ cu cual e mandatario a biaha pa Corsou aña pasa. E mandatario a contesta bek, cu MEP ‘no a entrega e carta segun regla’ y como tal e no por reacciona riba algo cu no ta entrega corectamente. MEP ta sigura cu esey no ta corecto.” Nos a conteste awe cu su argumentonan ta swak y nos a dune 5 dia pa contesta kiko no ta bon” lider di fraccion di MEP Evelyn Wever Croes a bisa Noticiacla diaranson.

KICO A PASA

Partido MEP despues di un bay bin di 3 luna cu minister Gerlien Croes, riba e asunto di jet priva cu e minister lo a paga pa hib’e Corsou aña pasa pa un asunto di trabou, a dicidi di usa e instrumento LOB (Landsverordening Openbaarheid van Bestuur), cu ta wordo usa ora cu un ciudadano kier haya sa informacion publico di un mandatario of gobierno. E mandatario e ora tin obligacion pa contesta esaki den un periodo specifico. Pero pa sorpresa di MEP, e minister a contesta cu MEP no a cumpli cu e reglanan, pa cual e, (esta e minister) consecuentemente no por cumpli cu e peticion. MEP di su banda a contesta e minister cu e partido a cumpli cu e regla y ta usa como motibo entre otro cu ora cu e minister a ricibi e peticion, e la pidi pa mas tempo pa contesta e carta. Como tal si e minister a pidi mas tempo, basa riba e carta, esaki kier men cu e ta reconoce e carta y ta mustra cu MEP a actua corecto. E partido a sigui bisando cu ta duna e minister 5 dia, pa splica exactamente kico no tabata corecto di e peticion di LOB. Si no cumpli, e partido lo tuma mas accion despues. Pa lesa e cartanan di e partido, click AKI, y pa lesa e carta di e minister, click AKI.