Ex-principe Britanico Andrew deteni pa delito di funcion

LONDON - E ex principe britanico Andrew Mountbatten-Windsor a keda deteni riba sospecho di un delito di funcion. Riba su propiedad na Sandringham polis britanico a haci buskeda den cas, segun e autoridadnan. Nan no ta bisa explicitamente cu ta trata di Andrew y ta papia solamente di un “homber den su sesenta añanan”. Mountbatten-Windsor a cumpli 66 aña awe.

Seis auto polis discreto y mas o menos ocho agente den paña civil a wordo mira poco despues di 08.00 ora local na Wood Farm riba e propiedad. Segun polis, investigacion tambe ta bay dilanti den condado Berkshire, unda e propiedad real Windsor ta situa, unda Mountbatten-Windsor tabata biba te poco tempo pasa.

Andrew aña pasa  mester a entrega tur su titulonan y a laga su residencia luxuoso Royal Lodge pa motibo di su relacion estrecho cu delincuente sexual Jeffrey Epstein, sospechoso di trafico grandi escala di mucha muhé. Despues di esaki e la bai biba den e cas di campo di rey Charles riba e propiedad Sandringham na Norfolk. E propiedad ey ta posesion priva di Charles y no ta wordo financia dor di gobierno britanico.