José María Balcázar ta e presidente di Peru nobo

LIMA - Congreso di Peru a eligi José María Balcázar como sucesor di José Jerí, kende a keda kitá for di cargo diamars mediante un mocion di censura pa motibo di escandalonan cu a toca su presidencia. Balcázar a gana di e candidata María del Carmen Alva, di Accion Popular, den e di dos y decisivo votacion di congresistanan cu 64 voto contra 46. E otro dos candidatonan, Edgar Reymundo, di Bloque Democratico, y Héctor Acuña, di Honor y Democracia, a keda descartá den e prome votacion. E victoria di Balcázar a tuma lugar den un di dos votacion despues cu ningun di e candidatonan no a logra e mayoria di voto requeri pa ser proclamá presidente den e prome ronda.