Diesun morto den atakenan mericano nobo riba supuesto boto di droga

WASHINGTON - E ehercito di Merca a bombardea   tres boto di nobo supuestamente relaciona cu trafico di droga den awa di Latinoamerica. Den e atakenan ey diesun persona a perde nan bida. E incidente ta uno di e atakenan mas mortal di ultimo tempo riba boto cu, segun gobierno di presidente Trump, tabata transporta droga. Den Oceano Pacifico a wordo alcanza dos boto, cada uno cu cuatro persona riba bordo, y den Laman Caribe un otro boto cu tres tripulante, segun imagennan publica pa e ehercito mericano. E botonan lo tabata navegando riba ruta conoci pa contrabando di droga.

145 MORTO TE AWOR

Segun informacion conoci, desde September 2026 ta tin 42 di e tipo di atake aki. Te awor por lo menos 145 hende a muri. Merca generalmente no ta presenta prueba concreto pa e afirmacion cu tin droga riba e boto nan, y aunke tin evidencia, no ta cla bou di cual marco huridico e operacionnan ta wordo ehecuta. Expertonan di derecho internacional a critica e  strategia. Nan ta indica cu elimina sospechoso sin proceso legal no ta permiti. Presidente Trump, sinembargo, ta declara cu Merca ta den un tipo di guerra contra cartelnan di droga den Latinoamerica y ta considera e atakenan como necesario pa frena entrada di droga na pais.

Mientras anteriormente e presion tabata enfoca directamente riba e ex-lider Venezolano Nicolás Maduro, analistanan ta bisa cu Washington awor ta continua e mesun linea militar agresivo di ultimo lunanan.