Hubert Goedgedrag nombra rector di Colegio San Nicolaas

ORANJESTAD - Despues di un periodo intensivo di seleccion, Minister di Enseñansa Michelle Hooyboer-Winklaar a introduci e Rector nobo di Colegio San Nicolas, esta Hubert Goedgedrag. E ta trahando caba como docente di wiskunde na Colegio San Nicolas for di dos aña pasa y anteriormente, a traha como docente y decano pa 22 aña na Colegio Arubano na Oranjestad. 

CONFIANSA Hooyboer-Winklaar tin tur confiansa cu meneer Goedgedrag, hunto cu e team di e scol pa HAVO lo ta exitoso den introduccion di e procesonan di renobacion y ahustacion di contenido y infrastructura.E titular di enseñansa ta describi Rector Hubert Goedgedrag como un persona cu tin experiencia y conocemento amplio di scol secundario y ademas e ta hopi motiva, ta comunica bon y ta enfoca riba e bienestar di e studiantenan. "?Su vision pa cu mehoracion di e calidad di enseñansa, maneho di comunicacion interno y externo, proposicionnan practico riba nivel di personal, cuido y infrastructura ta haci di dje e miho candidato pa yena e funcion di Rector di Colegio San Nicolas,” asina Michelle Hooyboer-Winklaar a expresa.

RALPH CROES

Ralph Croes ta sigui den e funcion di ConRector di Colegio San Nicolas mientras cu a nombra Claire Rombley como un ConRector nobo. E ultimo aki tabata un docente 1ste graads na Colegio Arubano na Oranjestad pa hopi aña y pa algun aña caba ta dunando les na Colegio San Nicolas.