Day: Cualkier plan pa refineria no ta afecta transshipment terminal

SAN ANTONIO – Cualkier plan pa cu e refineria (Valero), no tin un impacto riba e productonan y e (transshipment) terminal su operacion. “Nan ta permanece den su lugar” vocero di e refineria, Bill Day, a sigura NoticiaCla.com awe mainta. Cu esaki, e refineria ta confirma cu los di cualkier posibel compra, e lo no afecta e operacion di e transshipment terminal cu tin aworaki.

DESMANTELACION

Mientras cu e compania no por comenta riba cualkier discusion andando aworaki riba un posibel compra di e refineria, nan por confirma cu e proceso di desmantelacion ta continua. “E ta den e fase preparatorio” Day a sigui comenta awe mainta. ‘Tin algun trabou di preparacion tumando lugar, pero ningun ekipo di procesa (zeta) a wordo kita (ainda)” Day a sigui bisa. E preguntanan a a bin a rais di e desaroyo ‘nobo’ cu tin posibel interes di Citgo pa cu e refineria.

CITGO

Ayera NoticiaCla.com a reproduci un articulo di su socio di noticia Caribisch Netwerk, cu e compania petrolero Citgo, -un subsidiario di e compania estatal petrolero venezolano PDVSA-, tin interes serio den e refineria na Aruba. Esey prome minister Mike Eman a confirma na partner di noticia di NoticiaCla.com, esta Caribisch Netwerk ayera. E prome minister a bisa cu un posibel reapertura di e refineria na San Nicolas, ta trece un dilema cune; ‘Si Aruba kier un inyeccion financiero lihe of un futuro mas duradero pa San Nicolas’. Eman a bisa cu mas prome e aña aki, -via e minister venezolano di energia-, e noticia cu PDVSA kier a tuma e refineria na San Nicolas over, for di tempo cu ex presidente venezolano Hugo Chavez tabata malo. Awor ta parse cu PDVSA kier tuma e refineria over, pero via di su compania subsidiario Citgo.

COMBERSACION CU CITGO

Despues di combersacionnan entre minister di energia di Aruba Mike de Meza y e gerencia di Citgo na Houston siman pasa, un carta a bay pa Valero, doño di e refineria na San Nicolas. Na fin di dia, ta nan tin cu sinta na mesa cu Citgo pa sera un deal. Segun Eman, tin varios forma disponibel pa un toma. Y e caminda pa un toma definitivo ta hopi largo ainda. Entre e posibilidadnan, Citgo por wordo otorga directamente na Valero, of na pais Aruba, cu na su turno por lease esaki na Citgo.