Polis ta man yen cu problemanan di cacho na Aruba

ORANJESTAD – E problema di cacho na Aruba ta birando mas y mas alarmante. Y e siman aki un incidente cu un cacho y un turista, a hala atencion atrobe. Fuera di esey, polis tin nan man yen cu problema diario cu cacho. Sea cacho di caya cu ta ataca hende, of cacho di bisiña ta molestia y morde otro cacho y of hende. Y e ley di cacho ta wordo aplica, pero no ta dunando e resultado practico ainda.

TURISTA MORDI PA CACHO

E siman aki tabatin un situacion unda cu un turista di un bapor crucero a wordo mordi pa un cacho na Aruba, mientras cu e tabata na beach. E dama, identifica pa polis solamente cu e nomber di Dorothea, a bisa cu e tabata riba beach y tabata ‘hunga’ cu un cacho di e doño di un compania di watersports. Ora cu e tabata hunga cune, e cacho a morde na su huña. Na su regreso na waf, a atende cu e docter di e bapor crucero ‘Carnival Sunshine’. E bapor crucero a priminti di lo cubri e gastonan di e herida. Y asina tin mas informa di cacho cu ta circula.

CACHO DI BISIÑA

Hopi ta e raportahenan di polis cu ta haci mencion cu persona ta wordo mordi pa cacho di su bisiña. Hopi biaha e bisiña tin cu paga pa e gastonan y tin cu atende cu e problema di su cacho despues. Tambe tin caso cu cachonan cu ta den cura mes, ta bula cura y ta ataca otro cacho. Den e caso aki, ora polis a bay na e cas, no a haya ningun hende y a laga apenas un flyer y un ‘advertencia’ na e cas.

LEY DI CACHO

For di momento cu a cuminsa actua cu e ley di cacho, mas y mas asunto a bin dilanti na comienso di e aña aki. Mas ta e kehonan cu ta drentando serca polis, cu ta pone cu nan tin nan man yen cu e asunto di cacho. Mientrastanto e plataforma ta continua cu nan trabou riba e tereno aki. Mas y mas polis ta wordo 'entrena' riba e tereno di con pa actua cu e ley y e situacion di cacho mes. Pero ta notabel awor cu e situacion ta mucho mas grandi cu a spera y cu ta decenas di hende dia pa dia ta haya nan mes den situacionan fastioso cu ta envolvi cacho.