Gobierno a reuni cu gremionan riba tema di seguridad

ORANJESTAD – Aki 10 dia gobierno ta topa cu bek cu gremionan, hunto cu e hefenan di departamento di e.o. polis, VDA y otro instancianan. Esey gobierno a priminti e gremionan ayera durante e reunion riba seguridad. Temanan discuti, tabata entre otro protocol social, posibel medidanan a mediado y corto y largo plazo y mas. Pero nada concreto no a sali afo durante e reunion di ayera.

TOPICONAN DISCUTI

Por a tuma nota cu e reunion tabata mas bien un intento pa ‘brief’ e gremionan riba un sin fin di situacionnan actual, y kico ta haciendo cu nan. Entre otro a toca e tema di criminalidad pero mas riba su origen, y e plannan cu gobierno tin pa cu e prevencion. Despues a toca e tema di refineria unda cu gobierno mas bien a brief e gremionan riba e plannan cu tin pa cu e refineria, entre nan e intencion di Citgo pa habri e refineria. Loke a keda cla ayera tabata e hecho cu gobierno lo kier tuma e desisionnan aki hunto cu gremionan.