Croes: Plan ta pa keda dos aña mas como director di SETAR

ORANJESTAD – Mientras cu e compania di telecomunicacion di Aruba SETAR ta celebrando su di 40 aniversario e aña aki, su director Roland Croes, ta celebrando 36 aña trahando cu e compania. Di e 36 aña, 23 ta como su director general. Pero den e programa Noticiacla LIVE, e la anuncia cu e plan ta pa e  keda dos aña mas como director, y despues retira di e compania. E aña aki e ta yega e edad di pensioen (65)y e tin e chens cu e por keda dos aña mas. “Nos tin cu rond af tur esey si” Croes a bisa, cu ta nifica cu e ta un decision di gobierno di Aruba pa aproba e prolongacion, siendo e accionista unico. Pero tambe tin e conseho di e hunta di comisario y tambe consulta cu famia di Croes mes. Pero tur cos ta mustra cu e lo por keda 2 aña mas. E ta e persona cu mas largo a keda na timon di e compania. 

E SECUENCIA DI 5 DIRECTOR DI SETAR FOR DI 1986

Durante e 40 añanan di Setar su existencia, e la conoce 5 director. Ora cu Setar a cuminsa na 1986, e la cuminsa cu e director Edwin Croes, cu no a keda largo na e funcion. E director interino e tempo ey Patricio Nicolaas a tuma over y na 1989, Greg Tromp a tuma over pa 9 luna. A sigui Patricio Nicolaas atrobe tanten, te na 1996 ora cu Ludwig Jansen a tuma over e funcion di director. E tempo ey Roland Croes tabata director technico. Pero na 2003 Jansen a retira y e ora Roland Croes a bira director general, cual funcion e la tenet e cu awor, 23 aña despues. Por wak e programa completo AKI.