Resultado anochi di elegancia di Miss Aruba 2015

ORANJESTAD - Star Promotion Foundation ta contento di anuncia e nombernan di e ganadornan di e diferente premionan cu a wordo gana durante un anochi di elegancia den e prestigioso Ballroom di Marriott Resort & Stellaris Casino. Tur 6 candidata a desfila den trahenan cocktail di Trash by Ronchi cu sapatonan comodo di Aldo Shoes den e opening y a sigui despues pa mustra nan figura den e bikininan espectacular di Bahia Swimwear y na final di anochi a modela trahenan di gala di Trash by Ronchi. Pabien Alysha Boekhoudt cu e titulonan di Miss Popular, Miss Press, Miss Swimwear y Miss Elegancia pa Miss Aruba 2015. Pabien tambe na Thalia Croes cu e premio di Best Make-up y Nicole van Tellingen cu e premio di Best Hairdo pa Miss Aruba 2015. Awo preparacion ta sigui pa e gran final cu lo tuma lugar dia 23 di Augustus den e Ballroom di Marriott Resort & Stellaris Casino. Carchinan ta disponibel serca cada candidata of serca Susanita na telefoon 5926926.