Escandalo di cuido na Aruba: IVA ta señala morto cu por a wordo evita

ORANJESTAD – Mal cuido den diferente cas di cuido na Aruba a conduci den varios caso di herida serio y hasta morto di residente. Asina Inspectie Volksgezondheid Aruba (IVA) a conclui den e informe “Als zorg levens kost: calamiteiten in verzorgingshuizen”, publica diasabra. Inspectie a investiga seis incidente den periodo 2020 te cu 2024. Den tur caso, IVA a determina cu tabata trata di un calamidad: un evento inespera of no intencional den cuido cu a resulta den dano serio of morto. Segun e informe, ta trata, entre otro, di situacionnan unda problema di salud serio no a wordo reconoce na tempo, residente no a ricibi seguimiento medico suficiente y cuido basico a falta, cu a causa deterioracion di nan estado. Den varios caso, intervencion a tuma lugar demasiado laat ora situacion a bira agudo, cu resultado fatal. Inspectie ta constata cu e evento nan en principio por a wordo preveni cu identificacion corecto di señalnan y cuido adecuado.

CASO: RESIDENTE TA FAYECE

Den un di e seis calamidadnan investiga, Inspectie ta describi con un residente di un cas di cuido a mustra durante varios dia señal claro di deterioracion fisico, sin reaccion adecuado. Segun e informe, e residente a keha di debilidad creciente y tabatin un deterioracion visible di condicion general. E señalnan aki si a wordo observa door personal di cuido, pero no a wordo registra sistematicamente ni pasa na tempo pa evaluacion medico. Un dokter a wordo yama solamente ora situacion ya tabata critico. Inspectie ta indica cu den e periodo aki no tabatin observacion structural y cu no a wordo actua segun standard profesional pa identificacion y sigimiento. Ora finalmente ayudo medico a wordo solicita, intervencion ya no tabata posibel. E residente a fayece poco despues.

IVA ta conclui cu morto probablemente por a wordo evita si señalnan a wordo reconoci, registra y sigui na tempo, y si cuido medico a wordo inicia oportunamente. Inspectie ta enfatisa cu no ta trata di un falta individual, sino di fayo den supervision di sistema, direccion insuficiente y falta di responsabilidat claro dentro di institucion.

DEFICIENCIANAN STRUCTURAL

Resultado den e y otro caso nan ta apunta riba deficiencianan estructural den cuido di adulto mayor, incluyendo no cumpli cu standardnan profesional, falta di conocemento suficiente riba piso di trabou y management y supervision insuficiente. Inspectie ta subraya cu analiza incidente y haci inspeccion so no ta suficiente pa evita repeticion.

IVA ta yama urgentemente riba tur parti involvi pa asegura mehoracionnan di forma  structural. Ey ta enfatisa responsabilidad comparti di gobierno, institucionnan di cuido, supervisornan y profesionalnan di salud. Solamente cu un acercamento sistematico riba nivel administrativo y organizacional por garantisa seguridad, continuidad y calidad di cuido pa adulto mayor na Aruba. Por lesa e raport completo AKI.  NOTA: E potret cu ta compaña e texto aki ta un dramatisacion di e situacion cu e texto ta describi.