Venezuela strobando avionnan priva di biaha pa Aruba

ORANJESTAD – Avionnan priva for di Venezuela ta confrontando problema pa bin Aruba. Esaki a keda confirma pa fuentenan cu a informa NoticiaCla diabierna merdia. E problema ,segun e fuente cu a prefera pa no wordo menciona, ta cu personanan cu tin avion priva cu tin cu sali pa Aruba, ta hayando contratiempo serio ora cu autoridad tende cu nan ta bin Aruba. Contratiempo manera retraso largo, problema cu documento y otro tipo di strobamento. E problema aki a cuminsa for di diabierna mainta, y ta afectando e trafico aereo di avionnan priva seriamente. Si riba un diabierna p.e por papia di 30 avion cu ta yega, diabierna tabatin apenas 10 programa di cual 6 so a logra yega. Y mayoria di nan a yega no directamente sino via Venezuela.

E fuente ta sigui bisa cu e notificacionnan a wordo duna directamente na esnan responsabel pa Universal Aviation, (parti pasuit di aeropuerto), y cu nan no por bin directamente of cu hopi retraso. Nan no ta wordo stroba si ta otro destinacion nan ta bay. “Pero asina cu nan tende cu ta Aruba nan ta bay, e ta causando un problema” e fuente a sigui bisa. E fuente a mustra su precupacion pa cu e situacion y ta spera cu e asunto di ‘problema diplomatico’ por keda cla lihe. Esaki pasobra e prueba tabata palpable diabierna mainta cu Aruba a cuminsa sinti efecto directo di e menasa di Venezuela su presidente, Nicolas Maduro, cu tanten no laga e ex general Carvajal liber, Aruba lo sinti e efectonan di dje.