Geertvliet: Pago schoolkinderentoeslag ta depende di entrega di formulario na tempo

ORANJESTAD – Hefe di departamento di Asuntonan Social, sra. Lenny Geervliet, a duna splicacion na prensa di e rekisitonan pa bin na remarke pa pago di schoolkinderentoeslag. E intencion ta pa recorda tur mayor atrabes di medionan di comunicacion di loke mester haci y pa entrega e peticion na tempo. Esaki ta hunga un papel cardinal pa asina e departamento por tramita e pagonan na esun cu ta coresponde y pa e pago yega na tempo.

SOSTEN FINANCIERO NA FAMIANAN

Pais Aruba, pa medio di Departamento di Asuntonan Social, ta ofrece dos forma di sosten financiero na famianan di menos recurso pa loke ta trata e gastonan di educacion di mucha y hobennan. E prome ta consisti di e suma di 120 Florin pa cada mucha den un famia cu ta riba bijstand. E ayudo aki tin un maximo di 500 Florin pa famia. E di dos ta coresponde na e ayudo cu Gobierno ta brinda pa cu pago di schoolgeld cual ta e pago anual cu tur scol ta exigi pa e mucha por wordo inscribi y mag di atende les na scol. Tambe tin un balor di 120 florin pa cada mucha. Geervliet a splica cu pa bin na remarke pa e sosten financiero aki ta hopi importante pa e mayornan bay riba e prome dia di scol na scol di nan yiu y pidi e formulario indica. Despues ta yena e parti di e formulario cu ta destina pa e mayornan y entreg’e na Departamento Social no mas laat cu diabierna 28 di augustus 2015.

PROCESO ADMINISTRATIVO

E director a splica cu su departamento ta pone enfasis riba e dia aki ya cu despues di entrega e formulario, ta cuminsa un proceso grandi administrativo pa garantisa cu tur hende por haya nan pago adicional hunto cu e pago corespondiente na luna di september. Tambe a aclarea cu e ayudo di 200 florin riba e pago di bijstand ta un pago cu ta bin regular riba bijstand. E pago aki por stop na momento cu e mayor no entrega e formulario pa duna prueba cu ainda e tin yiu ta bayendo scol. Si tin algun pregunta adicional, mester di mas informacion of tin algun problema, por yama e Departamento di Asuntonan Social na 258-1100 of pasa personalmente pa haci un cita.