A reemplaza MAMBO cu ‘ Business Improvement District ‘BID’

ORANJESTAD- E asosacion antes conoci como MAMBO ta wordo reemplaza pa BID (Business Improvement District). Esaki a keda presenta oficialmente e siman aki durante un conferencia di prensa den Caya Betico Croes. E asosacion aki lo wordo dirigi pa conocido comerciante Stanley de Marchena.

COMPARACION

Premier Eman ta considera BID, manera un tipo di ATA, (Aruba Tourism Authority), den e sentido cu un ‘public private partnership’ lo percura pa promocion, mantencion, seguridad y actividadnan den caya grandi. E persona disponibel cu a wordo bon recomenda door di presidente di MAMBO sra. Audrey Lacle, ta sr. de Marchena. E ta bay carga e responsabilidad pa trece tur e partidonan hunto tanto den centro di ciudad como di sector publico pa hunto forma e BID. Den esaki AIB tambe ta envolvi.” Eman a bisa di ta spera cu pronto e asociacion importante aki por firma na notario pa asina cuminsa carga responsabilidad pa maneho, promocion, mantencion y actividadnan den caya grandi.

CONCEPTO

E concepto di BID ta algo cu Minister Benny Sevinger hunto cu institutonan na Merca cu tin experiencia den esaki ta trahando riba dje pa algun tempo caba. “MAMBO a haci e trabou aki pa hopi aña y nos ta gradici nan p’esey. E idea ta cu den e asociacion BID tin representante di ATA, ATIA, AHATA, Camara di Comercia, comerciantenan den Caya Grandi y banconan.” Business Improvement District (BID) ta keda institui oficialmente dentro di algun siman.