Interes di Citgo pa refineria Valero, ta pone gabinete Eman dilanti dilema

ORANJESTAD — Compania petrolero Citgo, -un subsidiario di e compania estatal petrolero venezolano PDVSA-, tin interes serio den e refineria na Aruba. Esey prome minister Mike Eman a confirma na partner di noticia di NoticiaCla.com, esta Caribisch Netwerk awe. E prome minister a bisa cu un posibel reapertura di e refineria na San Nicolas, ta trece un dilema cune; ‘Si Aruba kier un inyeccion financiero lihe of un futuro mas duradero pa San Nicolas’. Eman a bisa cu mas prome e aña aki, -via e minister venezolano di energia-, e noticia cu PDVSA kier a tuma e refineria na San Nicolas over, for di tempo cu ex presidente venezolano Hugo Chavez tabata malo. Awor ta parse cu PDVSA kier tuma e refineria over, pero via di su compania subsidiario Citgo.

COMBERSACION CU CITGO

Despues di combersacionnan entre minister di energia di Aruba Mike de Meza y e gerencia di Citgo na Houston siman pasa, un carta a bay pa Valero, doño di e refineria na San Nicolas. Na fin di dia, ta nan tin cu sinta na mesa cu Citgo pa sera un deal. Segun Eman, tin varios forma disponibel pa un toma. Y e caminda pa un toma definitivo ta hopi largo ainda. Entre e posibilidadnan, Citgo por wordo otorga directamente na Valero, of na pais Aruba, cu na su turno por lease esaki na Citgo.

MOU

E prome paso lo ta mas probable un Memorandum of Understanding (MOU). For di eynan, mester sondea si e partido interesa ta enberdad un cumprado apropia pa e refineria. Segun Eman, Citgo tin como bentaha, cu e kier rafina petrolio crudo venezolano, cu ta netamente loke e refineria ta traha pa haci, desde comienso di e siglo pasa.

REAPERTURA

Y na final di cuenta, un reapertura ta depende di e acuerdo cu gobierno. Eman ta tipifica e atencion di Citgo no como algo negativo, pero ta bisa mesora cu si yega asina lew mes cu Citgo por tuma e refineria over, e lo bira un decision hopi dificil. Esey ta wordo debati aworaki internamente den seno di gobierno.

EFFECTO CIERRE DI REFINERIA

Cu ciere di e refineria na 2012, manera ta conoci, den un solo tiro, Aruba a perde un entrada annual di 200 miyon florin. Cantidad di trahado mester a bandona Aruba. Segun Eman, mientras cu e perdida a wordo absorba, un reapertura di refineria ta keda atractivo. Di otro banda, su gobierno kier net un acercamento mas ‘berde’ y duradero, cu ta algo cu segun e premier, tin un posicion delantero riba tereno internacional.

DESTINACION ATRACTIVO

Eman kier haci di San Nicolas, un destinacion turistico atractivo, cu ta algo cu un refineria activo, nunca tabata posibel. E plannan pa un of mas hotel na Sero Colorado, -cu mas probable ta sinti nan mes mal sirbi cu un ‘bista’ riba un refineria operacional-, ta deliberacionnan cu cual Eman ta teniendo cuenta cune.

REAPERTURA SOSTENIBEL

Si e reapertura di e refineria sosode cu un maneho mas ‘sostenibel’ y duradero, y inclui traspaso di pidanan grandi di tereno bashi y no usable bek pa Aruba, e decision pa un reapertura lo ta mucho mas facil, Eman ta finalisa bisando.

Autor: Ariën Rasmijn pa Caribisch Netwerk. Foto: Ariën Rasmijn.