Aruba a habri aña 2026 sin un mediado di gobierno

ORANJESTAD – Aruba a keda sin un mediado di gobierno entrante 1 di januari 2026. E persona cu a tene e funcion ultimo, Anselmo Pontilius oficialmente a retira dia 31 di December ultimo despues cu e la ‘alarga’ e retiro aki cu un aña. Pontilius a confirma diahuebs anochi den e programa Noticiacla LIVE, cu enberdad Aruba ta sin un mediado di gobierno. Pero esaki lo no mester ta un problema pasobra gobierno por apunta temporalmente un of dos persona cu por asumi e funcion. Echo ta si, cu gobierno no a actua ainda y como tal, no tin un mediado di gobierno.

TARDANSA Y OF FAYO?

E pregunta ta kico a pone cu ainda no por a haya un mediado di gobierno nobo, pa reemplasa Pontilius. Su termino a keda extendi cu varios luna pa henter un aña, riba peticion di propio gobierno anterior y esun actual. Prome, Pontilius mester a retira for di december di 2024. Pero a pidie pa keda. A sigui cu e proceso pa haya un otro persona, pero esaki no a cana bon. Segun Pontilius, a haya hende, pero nan no tabata cualifica segun e normanan. Despues a para e proceso, pa cuminsa di nobo, pero nunca e proceso no a sigui. Como tal, cos a pega, y ainda no tin un persona. 

MEDIADO PA LABOR

E tarea di un mediado di gobierno, ta pa intermedia den conflictonan laboral, y sali afo cu un possible solucion, door di guia e partidonan opuesto den e conflicto. E ta un funcion, regla pa ley, paga pa gobierno, y cu tin cu funciona asina cu haci peticion door di e.o. sindicato of doño di trabou ora cu tin problema laboral mas parti.

ATRACTIVO?

E posicion no ta mustra uno mucho atractivo segun Pontilius, pasobra e orario, e pago no ta loke hopi ta verwacht, pues esaki ta bira un reto e ora, ora pa haya hende. Hende cualifica lo tabatin, pero pa un of otro motibo segun e reglanan, toch, nan no tabata resulta e persona apropia pa e funcion, of no tabata di acuerdo cu e condicionan di trabou. No ta conoci si esaki ta un prioridad pa e gobierno actual.