Varios departamento di Polis a muda

ORANJESTAD - Den e ultimo siman diferente departamento y unidad di Cuerpo Policial a muda y den algun caso a adapta e number di telefon tambe. E cambionan aki tin di haber cu apertura di e Warda di Polis nobo na Oranjestad, net dilanti esun bieu den Wilhelminastraat, unda antes tabata oficina di DIMAS. E cambio ey ta duna Polisnan mas oportunidad pa muda departamentonan pa por brinda mas y miho servicio na comunidad.

TELEFON

E cambio no ta encera solamente di un edificio pa otro, sino tambe cu a instala un sistema nobo di telefon cu ta encera cambio den e number. Pa por yama Polisnan di Oranjestad awor mester bel 527-3140.

CAMBIONAN

Jeugd- en Zedenpolitie tambe a muda for di e Warda di Polis na Balashi, pa e mesun edificio (ex-DIMAS) den Wilhelminastraat y nan number di telefon a bira 527-3191. Slachtofferhulp y Polis di Bario (Bario Regisseur) tambe ta den e mesun edificio na Wilhelminastraat. Polis di Trafico cu antes tabata den Judra Building na Dakota, a muda awor pa e Warda na Balashi, unda antes tabata Jeugd- en Zedenpolitie y tin un number di telefon nobo, esta 585-2500. Finalmente, e oficina di Recherche cu tin algun aña caba na Frankrijkstraat tambe a conoce cambio di number di telefon y por tuma contacto cu e departamento aki pa medio di 527-3250.

NUMBER 100

Cuerpo Policial ta pidi comunidad pa tuma bon nota di e cambionan di localidad y telefon. Pa emergencia por tuma contacto cu e number di custumber di Polis, esta 100 .