DVG: Cuidou cu brote di malesa Chikunguya si bo ta biaha pa of bin di Surnam

ORANJESTAD - Directie Volksgezondheid Aruba (DVG) diahuebs a bin cu un alerta general debi cu Surnam actualmente ta confrontando brote di e malesa Chikungunya. Pa motibo cu Aruba tin buelonan directo pa y for di Surnam, DVG ta conseha tur persona cu ta planea pa biaha pa Surnam of cu a caba di yega for di Surnam recientemente, of cu a of ta bay ricibi bishitante for di Surnam, pa keda alerta pa Chikungunya.

Chikungunya ta un malesa viral cu ta wordo transmiti pa e mesun sangura cu ta transmiti Dengue (sangura pata blanco). E sintomanan mas comun ta:

•         Keintura diripiente, 

•         Dolor fuerte di articulacion nan (pols, enkel, rudia, elleboog p.e.),

•         Dolor di cabes, 

•         Dolor di musculo, 

•         Cansancio 

•         Rash riba cuero (tin biaha) 

Normalmente e sintomanan ta presenta entre 2 y 12 dia despues di a wordo pica pa un sangura infecta cu e virus.

DVG ta pidi tur biaheronan y residente pa tuma e siguiente precaucionnan:

KEDA ALERTA PA SINTOMANAN

Si bo ta biahando pa Suriname of despues di regresa for Suriname, bo desaroya e sintomanan menciona aki riba, percura pa busca asistencia medico. 

SEMPER MENCIONA BO HISTORIA DI BIAHA

Ora bo bishita un doctor of proveedor di cuido di salud, menciona claramente si bo a biaha recientemente (den e ultimo 14 dia nan) pa Suriname of si bo a ricibi bishitante di Suriname. E informacion aki ta esencial pa un evaluacion y cuido adecua.

PREVENI PICA DI SANGURA

Persona cu sintomanan mester tuma extra precaucion. Pa evita di wordo pica pa sangura, pa asina preveni transmision local di e vius. Esaki ta encera usa repelente contra sangura, bisti camisa cu manga largo y carson largo,  keda paden y evita bishita areanan publico si tin sintoma.

PROTEHA BO MES Y BO FAMIA

Tur hende ta wordo encurasha pa elimina awa para innecesariamente rond y paden di cas y trabou. Controla scoternan bou mata, taira of tur otro articulonan grandi y chikito cu por retene awa pa asina reduci criadero di sangura. Pasobra menos sangura nifica menos chens pa transmision di e vius riba nos isla.

DVG ta sigui informa comunidad riba topiconan cu ta conserni salud publico pasobra, Bo Salud ta nos Prioridad.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw