Bestaansminimum a subi, aunke inflacion ta ‘abou’

ORANJESTAD – E bestaansminimum na Aruba a subi di nobo na december. Bestaansminimum, ta e cantidad minimo di placa cu un hende òf un famia mester tin pa por biba y cubri tur gastonan basico. Esaki ta inclui, entre otro: vivienda (renta òf hipoteca) . , cuminda y bebida, awa y coriente, transporte

Na Aruba, e minimum di biba ta wordo calcula y actualisa regularmente pa e Centraal Bureau voor de Statistiek (CBS), basando riba cambio den prijsnan. E ta wordo usa como un indicador importante pa mira si entrada di hende ta alcanza pa cubri e costo real di biba. Pa un famia di dos adulto y dos mucha, awor ta necesario 5.537 florin pa luna pa por sali, un aumento di diesocho florin compara cu november. Pa un persona su so, e bestaansminimum ta para riba 2.636 florin, ocho florin mas halto cu un luna anterior. Esaki ta resulta for di e cifra mas reciente di e Centraal Bureau voor de Statistiek (CBS).

E aumento ta bini principalemente door di costo mas halto pa vivienda y cuminda. E gastonan di biba a subi cu 27 florin riba base anual, mientras cu e costo pa cuminda y bebida no-alcoholico a subi cu 17 florin. Cu esaki, justamente e gastonan cu ta pesa mas riba entrada abou ta sigui subi.

INFLACION

Na mesun tempo, e inflacion como total a keda limita. E indice di prijs pa consumidor a yega 0,4 porciento riba base anual na december. Tambe di luna na luna e indice a subi cu 0,4 porciento.

E inflacion relativamente abou aki, sin embargo, ta tapa e realidad cu e canasta di cuminda y gastonan fiho ta bira mas caro di manera structural, mientras cu otro sector manera bistimenta y aparatonan di cas a bira mas barato.

Pa personanan su so, e brecha di entrada ta sigui grandi. Na december, e falta entre salario minimo y bestaansminimum tabata 650 florin pa luna, e di tres falta mas halto den seis aña pa e luna aki.

CBS ta enfatisa cu e bestaansminimum ta wordo ahusta mensualmento segun e desaroyonan di prijs. Cu esaki, e ta keda un indicador importante pa poder di compra, especialmente awor cu e costo di biba y cuminda ta keda persistentemente halto.

E indice di prijs pa consumidor ta basa riba un canasta di productonan y servicio di 408 producto basico. Compara cu november 2025, e prijs di 47,5 porciento di e productonan aki a subi. Na otro banda, 36,8 porciento di e productonan a bira mas barato, mientras cu 15,7 porciento di e prijsnan a keda sin cambio.