Corsou a conoce caso di asesinato riba sitio di staciona auto na Mambo

WILLEMSTAD – Awe den oranan tempran di marduga, sentral di polis a ricibi un notificacion cu lo tin un caso di atake cu bala den area di Bapor Kibra. Cu urgencia, polis a bay direct na e lugar y a resulta cu riba e sitio di staciona auto na Mambo tabatin un homber gravemente herida. Mesora polis a evalua e situacion di e victima, nan a pidi asistensia di ambulancia. Na yegada di e personal di ambulancia, ya no tabata posible pa haci nada mas pa e victima. Un dokter di polis a mester acudi na e sitio pa constata oficialmente cu e persona a fayece. Polis a cera henter e area pa por realisa nan investigacion. Tanto TFO como recherche a acudi tambe na e sitio pa asisti cu e trabou investigativo. Ainda no tin hopi informacion disponible di e caso aki, pero por confirma cu polis a topa un cantidad grandi di huls benta abou. E victima tabata benta abou banda di un Chevrolet Spark color cora.