Figaroa: FTA a entama caso sumario contra Cool Casino

ORANJESTAD – Sindicato FTA a entama un caso sumario awe mainta contra Cool Casino y su gerente. Abogado di e sindicato, Hose Figaroa a confirma esaki na NoticiaCla.com, indicando cu e motibo di e caso ta, e suspension di e trahadonan di e casino. Y cu e caso, kier percura pa e trahadonan aki por drenta casino bek y continua cu nan trabou. Algo cu nan no por haci for di siman pasa. Mientrastanto negosacionan ta continua. Y si dado momento logra resolve e problema laboral aki prome cu e caso tuma lugar, lo 'trek in' e caso e ora. No tin fecha poni ainda pa e caso sumario tuma lugar. 

E SITUACION

Sindicato di trahadonan arubano (FTA) tabata evaluando caso sumario contra Cool Casino, pa pidi huez manda trahadonan suspendi traha bek. Asina e presidente di e sindicato Hubert Dirksz a confirma na NoticiaCla.com dialuna mainta. Ta trata tin un total di 17 trahado cu for di siman pasa ta suspendi, - 3 inicial y despues 14 ora cu nan a bay sostene nan 3 coleganan-, cu gerente no kier permiti entrada bek den e casino.

REUNION CU MINISTER

Minister di Labor Paul Croes a reuni diadomingo anochi cu presidente di sindicato FTA, Hubert Dirks y algun trahador di Cool Casino na Riu Palace pa e situacion cu a presenta eynan. Manera NoticiaCla.com a raporta diasabra ultimo, e accionnan na e casino menciona, a continua diasabra anochi. Mientrastanto e reunion urgente tuma a lugar na bestuurskantoor.

INQUIETUD

Dirksz a mustra riba e inquietud di e trahadornan y e malcontento cu tin entre e gerencia y e trahadornan. Segun e presidente, trahadornan a bin ta haya maltrato di parti di gerencia na momento cu nan a bira miembro di sindicato. Trahadornan cu a afilia na sindicato y cu a sali protesta riba diferente inquietud awor a wordo suspendi sin ningun motibo.

ATENCION DI GOBIERNO

Minister Croes a informa e trahadornan cu lo pone atencion specifico riba e caso aki di parti di su departamento di Labor. Lo averigua motibo di e suspension di e trahadornan y lo informa gerencia si esaki ta valido. Tambe Departamento di Labor lo reuni cu Gerencia di Cool Casino pa scucha nan banda di medaya y asina trata na restablece pas laboral. Esaki sigur no ta un situacion sano pa e casino y pa e trahadornan cu ta sinti cu nan derechonan ta wordo trapa pa gerencia di e casino.

WELGA DIASABRA

Manera cu NoticiaCla.com a raporta caba diasabra, e welga di un grupo di trahado di Cool Casino na Riu Palace hotel a drenta su di tres anochi diasabra anochi. Diasabra anochi un grupo di 17 trahado a para pafo di e hotel/casino atrobe, como protesta contra e trato di e gerente di e casino. Tur 17 mientrastanto a keda suspendi, y a wordo prohibi entrada na e casino, segun presidente di e sindicato Hubert Dirksz. Dirksz tin 3 dia ta compaña e trahadonan y a bisa NoticiaCla.com diasabra anochi, cu e ta spera intermediacion di e mediado di gobierno dialuna. Mientrastanto e trahadonan suspendi ta keda protesta. Nota. E foto ta di e welga di diasabra ultimo di e 17 trahadonan cu tabata protesta dilanti Riu Palace. Nota: e foto principal ta di e trahadonan y sindicato reunioniendo diadomingo cu minister di labor Paul Croes.