Aeropuerto di Aruba ta hopi mas ocupa cu normal awe debi na tormenta na Merca

ORANJESTAD – “Pa motibo di cancelacion di buelonanan pa causa di tempo awe (25 di januari:red ), nos ta spera un dia mas ocupa cu normal na Aeropuerto di Aruba mainta, dialuna 26 di januari”. Asina aeropuerto a informa dialuna, como consecuencia di e tormenta di invierno na Merca cu a cuminsa den fin di siman.

HOPI BUELO CANCELA

Manera cu Noticiacla a raporta caba, tabatin hopi buelo cancela, sea for di Merca, of hasta for di Aruba. Buelonan no a yega Aruba, y esnan cu a yega, no a bolbe Merca. Esaki a causa e problemanan usual logistico.

FILA LARGO

Segun aeropuerto, pasaheronan por experimenta fila mas largo den diferente parti di e terminal.Y como tal a pidi pa tene cuenta cu e situacion. Control di flujo di pasaheronan pa buelonanan cu destino Estados Uni ta keda mescos: pasaheronan por drenta e salon di check-in no mas cu 3 ora promé di nan ora di salida programa.

BOARDING PASS

Pa esnan cu tabatin boarding pass y bo ta biaha solamente cu equipaje di man , bo por bay directamente na control di pasaporte — no tin mester di drenta e salon di check-in. NOTA. E potret no ta di e situacion di awe, sino di archivo di Noticiacla y ta sirbi solamente pa ilustracion.