Como 15 buelo di Merca a keda ‘pega’ na Aruba diadomingo

ORANJESTAD – Den fin di siman Aruba a experencia e efecto directo di e tormenta di invierno di Merca, Fern ora cu no menos cu 8 buelo no a yega Aruba mes, y 15 cu a yega, no a bolbe Merca. Y esey lo sigui tambe pa dialuna. Un total di 15 buelo a yega for di Merca, di cual 7 so a bolbe. Esey ta crea su problemanan logistico, cu turistanan tin cu keda mas largo Aruba, pasobra nan avion no a bin, of si e la bin, e no a bay. Den un situacion unda cu nada ta bin of bay, e ‘unico’ problema ta cu esnan cu ta keda Aruba, ta keda mas largo, pero no tin un problema grandi ya cu como cu avionan no ta drenta, e no ta ‘echt’ un problema. Ta ora cu manera awe, algun avion no bin, y otronan si bay, cu e ta bira un problema. Aeropuerto mes oficialmente te cu diadomingo anochi, no a duna un conteo oficial di e situacion. Loke cu noticiacla tin ta segun e portal di aeropuerto cu ta registra e yegada y salida oficial ‘en bibo’ di e dia. 

DIALUNA TAMBE

Pa dialuna e ‘fiesta’ aki tambe ta sigui. Ya caba por bisa cu tin planea pa 20 avion yega y 26 bandona Aruba. Pero ya caba tin 6 buelo cu ta cancela caba, y 3 cu no ta bay bek. Y unabez cu tin un situacion asina, ta dura varios dia prome cu e situacion por normalisa ya cu e aeroliñanan tin cu saca un avion extra pa busca e pasaheronan, y esaki den tempo di winter no ta facil. Y tanten cu e situacion di sneeuw sigui, tin cu warda e situacion di tempo drecha. Pues e efecto di sneeuw y ijs lo dura algun dia, y despues por cuminsa ahusta e buelonan. Pues tin pasaheronan cu por pasa basta dia extra na Aruba, y otronan por dicidi na Merca pa cancela nan biahe completo, debi cu nan vacacion por ta no ta duna suficiente tempo pa cambia e buelo. Pues por dura varios dia prome cu e problema completo aki coregi su mes. NOTA: E potret ta un un ilustracion artificial di e situacion, pero no ta refleha un aeropuerto real.