Prinsesa Amalia a completa entrenamento militar general y a wordo promovi pa corporal

AMSTERDAM -  Prinsesa Amalia a completa diabierna e Entrenamento Militar General (AMO) y a wordo promovi pa corporal. Esaki ta resulta di un comunicado cu Servicio di Informacion di Reino (RVD) a emiti diabierna. For di awor pa dilanti, durante su trabou pa Defensa, e prinsesa lo bisti un uniforme militar. E AMO ta forma parti di e formacion cu Amalia ta sigui desde september na Defensity College. E estudio ta consisti di parti theoretico, pero tambe di adquiri habilidadnan militar fisico, manera tira cu arma, lesa carta y completa un circuito di obstaculonan. Completa e Entrenamento Militar General (AMO) no ta nifica cu e prinsesa a termina na Defensity College. E lo sigui su estudio militar ayanan y lo keda conecta manera studiante-trabou cu Estado Mayor Administrativo di Defensa. Ademas di e formacion militar, Amalia ta sigui un bachelor Derecho Hulandes na Universidad di Amsterdam. Na 2021 e a gradua cum laude di VWO, despues di cual e a tuma un aña di pausa. Na 2022 e a cuminza cu e estudio Politics, Psychology, Law and Economics (PPLE), cu e a completa aña pasa.