METEO: Den cuater ora a drecha e problema na aeropuerto

ORANJESTAD – E situacion (manera NoticiaCla.com a raporta caba) na aeropuerto a normalisa. Di parti di servicio meteorologico a duna nan version final di kico tur a tuma lugar y trabounan cu nan a haci. Segun METEO ta relata den nan boletin, despues cu operacionnan na aeropuerto a confronta complicacion dor di un fayo den e sistema di observacion na Departamento Meteorologico, den menos di 4 ora por menciona cu e situacion a keda stabilisa. Danki na e bon cooperacion entre Meteo Aruba cu Meteo Corsow, Meteo Corsow a pone disponibel nan tecnico y ekipo pa yuda Aruba den e situacion cu tabata aden. Diferente Departamento y instancianan na Aruba a traha conhuntamente den e situacion cu a surgi pa asina por a yega na un solucion mas rapido posibel.

UPGRADE

Mirando e importancia di Meteo pa aviacion y publico en general, gobierno di Aruba ta trahando for di basta luna pa implementa full upgrade di sistemanan meteorologico na Aruba, pa asina Aruba lo ta conta cu un di e sistemanan mas avansa den e region. Mayoria di e vuelonan cu a cancela basa riba e inconveniencia aki a keda reprograma pa diaranson. Oficina di Turismo a percura pa tur esunnan cu a keda na Aruba haya e asistencia necesario.

GRADICIMENTO

Kier a gradici e esfuerso grandi di e ekipo cu conhuntamente a sa di mantene tur cos bou di control departamentonan manera Meteo, Directie Luchtvaart, ANSA, AAA, ATA, AHATA y Ministerio di Turismo y Transportacion.