Joia Aruba by Iberostar a yuda impulsa aumento di 10 porciento den benta na region di Americas

ORANJESTAD/MIAMI – E hotel nobo na Aruba Joia Aruba by Iberostar y esun na Miami a contribui pa un aumento di 10 porciento den benta na region di Americas. Asina e compania madre Iberostar Group a raporta e siman aki. E compania a raporta cu a celebra un cierre fuerte di aña 2025 y ta wak pa dilanti, cu speranza di mantene un plan di inversion di 1 miyon Euro te na 2028, desaroyando proyectonan nobo y renovando resortnan cu ta existi.

AUMENTO 

E grupo di resort a registra un entrada administra di 5.1 miyon Euro aña pasa, un aumento di 14 porciento compara cu 2024, loke ta indica exito fuerte y crecemento prometedor pa e añanan venidero.

Mientras Iberostar ta cuminza celebra su aniversario di 70 aña e aña aki, e compania ta pone prioridad riba crecemento. E ta emplea 40,000 hende di 95 nacionalidad diferente y tin un portafolio di 100 hotel, representando 35,000 camber repartí den 14 pais na mundo entero.

JOIA ARUBA 

E resort na Aruba a habri inoficialmente na december di 2024 y na 2025 a habri ofiicalmente den zomer. Na januari cu apertura di e restaurant GAIA, e hotel awor ta completamente operacional, esta cu tur facilidad den e propiedad ta habri.