Compania mama di TikTok ta confirma: app a wordo separa pa mercado mericano

NEW YORK - E compania chino ByteDance, doño di e popular app di video TikTok, a establece un compania nobo na Merca, unda TikTok di e pais ey ta registra. E compania nobo ey ta, pa e mayor parti, den man di inversornan mericano. Di e manera aki TikTok ta cumpli cu legislacion mericano, segun ByteDance a informa.

TikTok, un di e apps di video mas popular na mundo, ta wordo critica ya casi seis aña na Merca y otro paisnan occidental, paso cu su compania mama ByteDance tin lazo fuerte cu gobierno chino. Segun e preocupacion di gobiernanan occidental, esaki por causa cu datonan sensitivo di usuarionan por termina den man di gobierno chino. Tambe tin temor cu China por influya e tipo di videonan cu usuarionan ta mira, y asina guia opinion publico na paisnan occidental.

Durante e añanan pasa, funcionario publico na Hulanda a ricibi conseho pa no tin e app instala mas riba telefononan di trabou.

ANUNCIA YA FOR DI LARGO

Den su prome termino, presidente Trump ya a purba prohibi TikTok na Merca, of hasi cu e app cay pa un parti den man mericano. Su sucesor Joe Biden a sigui e mesun ruta. Oficialmente e app ta prohibi na Merca ya mas cu un aña, pero usuarionan casi no ta nota nada di esaki: Trump ta instrui su propio Ministerio di Husticia constantemente pa no tuma accion, mientras cu nan ta warda riba un trato.

E trato ey ta wordo anuncia ya hopi luna pa Trump, pero awo finalmente a wordo confirma oficialmente pa compania mama chino: TikTok US ta pa poco menos cu 20 porciento propiedad di ByteDance, segun e compania a declara. E resto ta den man di empresarionan technico manera Larry Ellison (Oracle) y Michael Dell (Dell Technologies), amigonan personal di Trump. Ademas, companianan di inversion for di Merca y Emiratonan Arabe Uni a drenta tambe den e compania.