Analisis: Ora cu bo ‘bolter’ un dia liber cu no ta liber

Scirbi pa Tito Laclé

Pa algun ora tabatin un grupo grandi di persona contento, y un otro grupo di hende (kizas mesun grandi) hopi rabia y indigna. Tur pa un decision cu gobierno a tuma un dia prome. E decision tuma dia 19 di januari (6 dia prome cu Dia di Betico) pa cambia e dia liber di Dia di Betico, di diadomingo 25 (di januari) pa 26 di januari, cu ta cay riba un dialuna. Dia di Betico ta un e varios dianan liber di aña, riba cual ningun hende mester traha, of si bo traha mes, mester wordo paga double. Asina e ley ta. Mi a compronde cu den pasado, a cambia e ley cu ta pone cu si e dia liber cay riba un diadomingo, un minister por a cambia esaki automaticamente pa dialuna. Pero cu despues e lo a cambia bek. Mi no por confirma esey y honestamente, mi no a busca info riba esey. 

Pa aworaki, ta bay pa e reaccion cu mi a haya, tanto pro como contra.. y tur e ‘bululu’ cu a sigui. Asina cu e decision a cay dia 19 , y cu un app a cuminsa circula algun ora y e siguiente dia despues cu e informacion, mi a haya un cantidad di mensahe di comerciantenan sumamente indigna y confundi, puntrando si e ta berdad, y con por ta possible cu den menos di un siman prome cu e fecha en cuestion, esaki ta sosode. “No por anuncia esaki toch menos cu un siman?” tabata un comentario. Tambe tabatin e keho cu ‘Esaki ta costa tur entrepeneurs simplemente 100% extra den salario y perdida di entrada!”. Comercio a reacciona basta fuerte y un gremio, Comerciantenan Uni di Aruba (CUA) te hasta a yama un conferencia urgente pa awe diahuebs mainta pa atende cu e situacion y comparti nan indignacion. E presion aparentemente a yuda, pasobra den algun ora, gobierno a haye ta bira e decision  ey. Mesora CUA tambe a cancela su conferencia pasobra ‘no tabatin necesidad mas’. Gobierno a publica un comunicado cambiando e situacion, dus a bira e decision bek, pero esaki a crea un otro problema, pasobra no tur hende tabata ricibi e mensahe aki. Y e problema ey tabata mas pio. E la crea mas confusion. Kico tabata berdad awo. Berdad cu gobierno a bira cos bek??? Ata otro avalanche di mensahe cu mi a cuminsa ricibi. Si ta berdad cu gobierno a bira esaki bek. E biaha aki, e avalanche tabata mas grandi pasobra tabata ricibi esaki tanto di comerciante como trahado. Comerciante pasobra nan no tabata sa kico ta kico y mester a prepara debidamente. Y trahadonan cu tambe a keda confundi, ya cu nan a traha plan caba pa goza e dia ey. Y diripiente nan ta tende cu nan tin cu bay traha atrobe. 

E comunicado di gobierno cu tabata trata e ‘revocacion’ di e decision pa duna liber dialuna, tabata traha di un forma (mi ta kere) pa sigura cu gobierno (lesa: minister Wendrick Cicilia), no ta perde cara. Den un forma ‘cu hopi tactica’, a splica e situacion, y pakico no por duna e dialuna liber ‘mas’. E comunicado a causa hilaridad tambe cerca hopi, unda cu algun a bisa, cu no por kere cu ‘tur e conseheronan cu tin den gobierno, cu niun por a duna e conseho corecto huridico’? y ta pone cu e minister a comete un ‘vupa’ asina? Su inexperiencia y hubentud, porta por ‘scap’e’. Pero no ta pesey bo tin consehero cu SI sa de que se trata? 

Loke mi a haya interesante, tabata e parti unda cu inicialmente a purba hustifica e dia liber:” Diadomingo ta tradicionalmente, den sociedad Arubano, un dia di descanso y famia, cu enfasis, entre otro, riba actividad di iglesia y conexion social; e coincidencia di un dia nacional publico y conmemorativo cu e structura social menciona ta resulta den un peso dobel riba e ciudadano, en particular relaciona cu atendencia di ceremonia y participacion den actividadnan conmemorativo," e decreto ministerial ta indica.”. Dus, pueblo ta keda asina cansa, door di bay e ceremonia, y despues core rond algun ora pa disfruta di e actividadnan? Y ta stroba henter e pueblo di bay iglesia y pasa rato hunto? 

Enfin, henter un bruhamento di varios ora, cu a tuma tempo (valioso) di tanto comerciante como trahado, pasobra gobernantenan a comete un vupa. Ainda tin un cantidad di dia liber na caminda den e prome mitar di e aña aki. Gobierno, corda check bon, regla cos bon, pa no bolbe pega barco!. Un simpel conseho!.