Na Corsou a entrega keho contra ministernan van Heydoorn i Pisas

WILLEMSTAD - Historia lo ripití? Ta e pregunta ku ta surgi despues di tuma nota di e keho ku e siudadano Elvis de Andrade a entregá ayera na ‘Landsrecherche’ Curaçao (LrC). Den e keho de Andrade komo siudadano preokupá, ta splika ku e ta sinti su mes obligá di entregá un keho kontra di Ministernan Van Heydoorn i Pisas.

Motibu di e keho aki ta, ku te ayera 21 di yanüari 2026, Ministernan Sithree van Heydoorn i Gilmar Pisas ta figurá riba e registro di Kámara di Komèrsio respektivamente komo Presidente i Miembro di Direktiva di Asosashon Movementu Futuro Kòrsou.

E keho ta entregá konforme e lei di ‘screening’ ku ta konta pa tur minister den funshon, ku no tin mag tin niun aktividat o sea funshon adishonal.

Manera menshoná tur dos e ministernan tin funshon den e Asosashon Movementu Futuro Kòrsou inskribí na Kámara di Komèrsio bou di e number 119273.

Na opinion di de Andrade, esaki ta empugná ku lei eksistente. E keho a keda entregá ayera na LrC.

Den pasado Kòrsou a konosé un situashon similar, kaminda ku e minister Alcalá-Wallé mester a entregá su retiro komo minister i asta mester a presentá den korte penal dilanti di hues.

Korte a haña Alcalá-Wallé, kulpabel, pa motibu ku a propósito e no a menshoná ku e tabatin aktividatnan adishonal durante ‘screening’.

Ministerio Públiko a demandá Alcalá-Wallé e tempu ei na 150 ora di trabou i 3 luna kondishonal.

Korte a haña Alcalá-Wallé kulpabel, pero no a imponé kastigu. NOTA: Texto ta scirbi den papiamento fonetico di Corsou.