Cinco aerolinea mericano a cancela 10 buelo pa Aruba awe

ORANJESTAD – Mientras cu e problema cu aparato di METEO a keda drecha na aeropuerto Reina Beatrix awe, un total di 5 aerolinea representando 10 a keda cancela. Pa loke ta e avionnan y buelonan cancela, vocero di aeropuerto Hendrik Croes a bisa cu esey lo wordo remedia mañan. No ta conoci ken lo paga pa e gastonan incuri pa e buelonan cancela, pero esey lo bira conoci despues.

RESOLVE PROBLEMA

E forma con lo resolve e problema mayan, grandemente ta conoci segun Croes. Algun aerolinea lo bin cu avionnan mas grandi, otronan lo bin cu dos buelo y otronan ta simplemente bin busca esnan cu a keda pega awe. No ta conoci ken lo tin cu paga pa e gastonan ‘extra’ incuri awe. Esey lo tin cu wak den e proximo dianan. Pero e problema principal ta soluciona. E aparato ‘daña’ cu yama METEO AWOS, ta drecha. Mientrastanto METEO mes a emiti nan propio comunicado (dos) unda cu nan ta splica e situacion cu a surgi, y despues ora cu e problema a drecha, nan a emiti un otro.

DIFERENCIA

Un otro punto interesante tabata, cu mientras cu buelonan di e aerolineanan a cancela, esnan local (Aruba, Corsou) y region (Venezuela), a sigui bula manera nada no a pasa. Esey a pone hopi hende pensa, cu si ta e companianan mericano so tabata precupa pa nan seguridad of si nan ta simplemente exagera di e situacion. Croes na inicio di e problema, a anticipa si cu ta riba discrecion di cada compania/piloto, si nan ta dicidi di bula e avion(nan) of no awe. Pero tabata curioso cu netamente tur esnan mericano a opta pa no bula, y e otronan si. Esey a demostra cu nan nivel di seguridad ta porta mas halto, pa motibonan di seguro, of simplemente un nivel mas halto.