KLM a dicidi di haci internet gratis a bordo di mayoria buelo europeo

SCHIPHOL - Pasaheronan na bordo di un gran cantidad di buelonan europeo di KLM pronto por uza WiFi gratis. Internet den aire tabata disponible caba, pero te awor e tabata costa placa. Esaki lo cambia a partir di diarazon (22 di januari), segun cu e compania di aviacion a anuncia.

Internet sin costo lo wordo disponible riba mas o menos mita di e flota europeo. Esaki ta inclui especificamente e avionnan Airbus A321neo, Embraer E195-E2 y mas cu mita di tur Boeing 737-800. E medida no ta aplica pa Embraer E175 y E190, ni pa Boeing 737-700 y 737-900. Tambe e Boeing 737-800 mas bieu, 11 total, no tin WiFi na bordo.

Den e avionnan cu KLM ta uza pa buelonan dentro di Europa, no tin pantayanan di entretenimiento. Door di haci internet gratis, KLM kier aumenta e comfort di su pasaheronan.

Pasaheronan por uza e internet sin limitacion despues di log in of despues di registra como miembro di Flying Blue.

“Nos ta scucha bon kiko nos pasaheronan ta considera importante y internet gratis tabata caba algun tempo riba nan lista di deseo. Cu e paso aki nos ta haci e biahe dentro di Europa mas personal y mas comfortabel: cada hende por yena su buelo di su propio manera y keda conecta. Nos ta contento cu nos por haci esaki posible awor pa nos pasaheronan,” asina Stephanie Putzeist, responsable pa experencia di cliente dentro di KLM, a bisa.