• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Pensamento di minister Wever ta cu economia di Aruba ta drenta 2026 cu fundamento fuerte

ORANJESTAD - Economia di Aruba ta drenta e aña 2026 cu un momentum positivo, stimula pa un desaroyo economico fuerte, maneho financiero prudente y un nivel creciente di confiansa for di empresarionan, inversionistanan y partnernan internacional. Tur esaki tabata pensamento di Geoffrey Wever, Minister di Finansa, Asunto Economico y Sector Primario, durante su discurso di apertura na AVA Community Talk cu yabata tin e tema “New Year, New Risks – Outlook 2026.”

Minister Wever a enfatisa cu e resultadonan economico cu Aruba a logra den e ultimo aña no ta solamente indicadoran tecnico riba papel, sino resultado concreto cu ta wordo sinti den bida diario di e ciudadano, den sector empresarial y den finansa publico.

Segun Minister Wever, momentum economico no ta surgi casualmente, pero ta resultado di stabilidad, claridad den maneho y decisionnan di gobernacion cu ta enfoca riba kita barera innecesario pa ciudadanonan y empresarionan, creando un ambiente di confiansa y oportunidad.

Cifranan oficial di 2025 ta confirma cu economia di Aruba a mustra un crecemento robusto. E cantidad di permiso pa negoshi nobo a crece cu 16 porciento compara cu 2024, mientras cu e cantidad di relacionnan di trabao a aumenta cu mas cu 3.000 empleo nobo den e transcurso di e aña. Tambe e cantidad di dunadornan di trabao a sigui crece, loke ta indica cu iniciativa empresarial a sigui activo y resiliente, apesar cu den un contexto internacional tin incertidumbre.

E desaroyo economico positivo aki tambe a refleha den entradanan di gobierno. Ingresonan for di BBO, invoerrechten y winstbelasting a mustra un aumento conhunto di aproximadamente Afl. 80 miyon den e prome tres kwartalanan di 2025 compara cu mesun periodo di 2024. Hunto cu un maneho di gasto prudente, esaki a resulta den un surplus presupuestario di Afl. 309 miyon, equivalente na 3,9 porciento di Producto Nacional Bruto.

Paralelamente, Pais Aruba a sigui reduci su debe publico. Te cu e di tres kwartaal di 2025, a wordo paga Afl. 405 miyon na debe y Afl. 194 miyon na interes, loke a resulta den un debt-to-GDP di 61 porciento. Segun Minister Wever, e indicadoran aki ta confirma cu economia di Aruba ta sigui move den un direccion positivo y cu tin confiansa real den Aruba como luga pa inverti, traha y construi un futuro.

E crecemento economico den 2025 a surpasa claramente e expectativa inicial. Mientras cu den mei e proyeccion tabata un crecemento nominal di aproximadamente 3,2 porciento, e resultado final a yega na 5,9 porciento, principalmente impulsa door di e sector priva. Pa e proximo añanan, e proyeccionnan economico ta indica un continuacion di crecemento gradual y duradero, cu un expectativa di 2,6 porciento den 2026 y 1,9 porciento den 2027.

E presupuesto aproba pa 2026 ta cumpli cu norma presupuestario manera ancra den ley y ta contempla un surplus di Afl. 215 miyon, mientras cu e debt-to-GDP ta proyecta pa baha mas leu te na 58 porciento. Minister Wever a enfatisa cu e fundamento financiero aki ta esencial pa planificacion, evaluacion di riesgo y decisionnan strategico, especialmente pa profesionalnan den accounting y finansa.

Pa sigi stimula e economia, gobierno ta keda enfoca riba entrepreneurship, diversificacion di e economia y pa facilita inversion. Den e cuadro aki, recientemente a anuncia y introduci, cuatro incentivo fiscal nobo cu ta dirigi pa fortifica e structura economico di pais. E medidanan ta enfoca riba haci Oranjestad y San Nicolas mas atractivo pa inversion, stimula inicio di negoshinan nobo den sectornan prometedor, facilita establecemento di companianan den Free Zone y motiva profesionalnan Arubiano cu ta biba afo pa regresa y contribui activamente na economia local.

Tur e iniciativanan aki tin e mesun meta final y un vision claro: construi un economia mas diversifica, mas resiliente y mas duradero, cu centronan urbano mas fuerte, cu mas actividad economico, mas empleo y mas inversion pa Aruba.

Minister Wever a conclui cu un yamada na colaboracion estrecho entre sector publico y sector priva, enfatisando cu solamente hunto por logra progreso duradero.