Situacion a normalisa atrobe na aeropuerto y aparato a drecha

ORANJESTAD – Situacion a normalisa na aeropuerto Reina Beatrix atrobe, y e aparato ‘daña’ na METEO, a keda drecha. Pero e daño tabata haci caba; vocero di aeropuerto Hendrik Croes a confirma diamars atardi na NoticiaCla.com cu entretanto 5 aerolinea mericano y 10 buelo total a keda cancela, a consecuencia di e problema aki. Kico exacto a sosode cu e aparato, cu ‘diripiente’ e por a funciona atrobe, Croes no por a bisa. “Esey bo tin cu puntra Directie Luchtvaart”. Hecho ta, cu un aparato cu a ‘crash’, bay down, diripiente a wordo drecha y ta funciona atrobe.

E PROBLEMA

E problema, -manera Croes a informa mas tempran den dia-, a cuminsa un dia prome, ora cu e aparato en cuestion na METEO, no por a suministra avionnan corectamente cu informacion. E no tabata traha ‘optimalmente’. Un dia despues, e aparato a daña completo y no tabata traha ‘at all’. Esey a pone cu a crea un situacion hopi fastioso pa aeropuerto, y tambe direccion di aviacion civil, cu a pasa gran parti di dia reuniendo pa resolve un problema cu tabata mustra basta serio. E problema: falta di por duna informacion crucial di tempo na e pilotonan, cu mester determina con uza e informacion pa por lanta y baha nan respectivo avion. Informacionnan ‘simple’ manera velocidad y direccion di biento, y e temperatura. Segun Croes, dado momento personal di toren di control, tabata basa nan informacion riba e wowo humano, y guia e pilotonan basa riba e ‘bandera di biento’ na final di e pista di avion. Preguntanan cu no por a haya contesta ainda, manera con diripiente e aparato cu tabata mustra hopi daña, y pa cual no tabatin backup, diripiente por a wordo drecha. Y si berdad e aparato tabata asina daña manera a kere inicialmente. Y mas importante, con bin no tabatin un aparato como backup pa evita un tipo di problema asina.

APARATO NOBO

NoticiaCla.com a compronde cu pa varios luna ta deliberando riba e reemplazo di e aparato aki, unda cu a presupuesta un suma cuantioso di por lo menos 300 mil florin, pero a warda cu e compra pasobra kier a busca uno mas caro di mei miyon florin. E decision ey no a wordo tuma, cu a causa e tardansa. Hefe di METEO na Aruba, Marc Oduber a confirma tambe den su propio boletin, cu tin 3 luna trahando riba e proceso caba, y cu lo dura un 3 luna mas prome cu e aparato nobo por ta na Aruba.