Reaccionnan dividi riba conseho di paz di Donald Trump, Hulanda tambe a wordo invita

WASHINGTON – Cada bez mas pais ta haci conoci cu nan a ricibi un invitacion di presidente mericano Donald Trump pa drenta den su conseho di paz. Entre e paisnan invita tin Australia, Canada, Francia y Reino Unido, pero tambe Paraguay, Chipre, Albania, y inclusive Rusia y Belarus. E reaccionnan ta varia: tin pais cu ta mustra entusiasmo, mientras otro nan ta responde di un manera mas reserva.

Tambe Hulanda ya a ricibi un invitacion, asina un vocero di prome minister Dick Schoof a confirma despues di reportahe di NRC. Hulanda aun no a dicidi si lo acepta e invitacion. “Ainda tin hopi pregunta tocante cua esaki exactamente ta implica,” asina e vocero a declara.

E yamado “board of peace”, cu Trump mes lo fungi como presidente, ta parti di e di dos fase di e plan mericano di binti punto anuncia pa Gaza. E territorio palestinonan devasta lo ta e prome punto di atencion di e conseho, mientras cu mas adelante e ta pensa di usa e conseho pa otro conflictanan.

Awe, Rusia y Belarus a anuncia cu nan tambe a ricibi un invitacion. Normalmente, pais occidental ta evita ambi pais debido na e guerra na Ucrania. E Kremlin a informa cu e invitacion “ta wordo studia”, mientras cu lider Belarussiano Aleksandr Loekasjenko a bisa cu el a acoge e invitacion.