Analisis: Pakico situacion di trafico a bay fo’i man. Final!

Scirbi pa Tito Laclé 

Despues di 3 analisis riba e tema di momento, trafico insigur, a bira un echo cu e temanan a toca hopi hende, y habri hopi herida. Ademas, a habri un caha di pandora tambe. Den e di 4 y ultimo analisis riba e tema aki, lo toca un otro aspecto, cu ta cellular y tambe bentana getint. Dos tema cu ta keda bin bek. Mientrastanto mas hende a cuminsa publicamente reclama, entre nan FADA, cu ta di acuerdo cu leynan ta anticua y cu tanten cu no aplica esaki, tanto bal. Polisnan tambe a cuminsa reacciona di nan banda. Y nan ta bisa tambe cu tin control, pero cu e leynan no ta suficiente y tampoco e multa. 

CELULAR

Un di e kehonan mas grandi ta e uso di cellular durante coremente di auto. Hopi hende ta usa cellular y ta causa accidente chikito y tambe te hasta grandi. Un descuido chikito, ta suficiente pa causa un accidente. Cuanto biaha mi ta wak hende cu wowo ta riba cellular, coriendo den mi direccion y mi ta warda pa nan bin dal den mi. Y asina tin hopi. Y esey ta esnan cu por wak, pasobra nan bentana di auto no ta getint. Esnan cu tin bentana getint, no ta wordo mira y ta ‘scapa’. Pero e mesun bentana getint tambe ta crea otro problema. Door cu hopi ta tint bentana dilanti tambe, e ta bira dificil pa nan mes wak anochi, y ta usa nan bright pa por tin miho bista. Esey ta strobe e auto contrincante di wak, y asina ambos ta bright dim otro cu consecuencia ya conoci. Celular awendia ta necesario, pero tambe ta necesario pa ora di core auto, no usa esaki. Y si, bla bla bla. Pero nos bida, ta draai rond di cellular. MI a hasta wak polis riba motorcycle cu cellular den man, papiando.  Mi a wak trucknan grandi (na Merca ta yama nan 18 wheelers), unda cu cellular ta den man di e chauffeur, mientras cu nan ta bira e truck grandi ey. Danki Dios awendia mayoria auto, ta bin cu e sistema ‘hands free’, cu ta laga bo papia sin cu bo mannan ta ocupa cu cellular. Asina mes, e atencion ta riba e combersacion, envez di e trafico. 

TINT

Un problema cu hopi specialista di trafico y di Seguro a comentami, ta e parti di tint. Berdad cu tin ley contra tint, pero polis masha tempo a dicidi cu no ta controla esaki mas. Aunke cu tin e ley. Esey ta pone cu hopi hende ta usa e tint, ta obstaculisa nan propio bista, cu tur consecuencia cu esaki por tin. E ‘pret’ ta, cu mientras cu polis no ta controla, otro departamento di gobierno si ta controla. Ora bo bay keur auto, DTI no ta keur si bo tin tint riba bo auto. Pues, hopi hende ta traha cita, y concientemente ta kita e tint di e auto, keur nan auto, y despues ta pone e tint bek. Problema resolvi. Ken ta gaña ken? Como cu polis no ta controla tint, e trabou di DTi ta ‘PORNADA’. Un gasto extra pa e doño di auto cu tin cu paga pa kita tint, y paga pa pone tint bek. Un gasto, cu nan no ta ‘mind’, basta e auto ta getint. Mi tambe tin tint, y dilanti, pero di un grado cu bo por wak bon bon paden, y ami por wak bon bon pafo. Dus mi no mester bright ningun hende. 

EFECTO DI ANALISIS

Pa loke ta e analisisnan scirbi, mayoria di hende ta di acuerdo, y a comparti esaki den varios forma. Loke ta resalta, ta cu e Leynan ta keda anticua, y cu e multanan no ta suficiente. Cu anticua, kier men cu mester aumenta e multanan cu e ley ta prescribi. Por ta e ley mes ta OK, pero no e sancion contra dje. E no ta suficientemente impactante, pa pone un hende pensa dos biaha si e ta comete e infraccion. 

CONTROL

Ma nota cu diripiente, controlnan a bolbe cuminsa. Boshi polis hunto, ta duna multa. E ta bunita, pero e no ta dura, pasobra despues di un rato, no tin control mas. Hende sa esey. Pues nan ta alerta pa algun siman, y despues, ta bek pa haci malo atrobe pasobra  ‘e controlnan’ no tey mas. Pues, control temporal, NO ta yuda. Mi por imaginami cu polis ta lesa esaki y ta pensa: Ma bon. Awor cu ta controla, TAMPOCO ta bon. Wel, e punto ta, ora di haci algo, hacie bon. Of no hacie. Pero, e intencion ta loke ta conta, y berdad, miho ALGO cu nada. Pues, bon bini controlnan atrobe, y ta spera cu esakinan lo ta pa largo y no solamente pa ‘yena e quota mensual’ di multa. Pasobra mi a compronde cu cada polis mester yena un quota di multa pa luna. Unabez cu nan logra esaki, nan ta stop di multa. Mi no sa si e ta berdad, pero esey mi a tende.

FINAL

A purba cu e analisisnan pa purba ilustra algun frustracion, punto di orden y loke ta biba den comunidad riba e tema. Y manera mi a bisa, hopi tabata cu palabra fuerte, pa cual mi no ta dispensa, pasobra tin biaha mester papia cu palabra ‘bruto’ pa e mensahe drenta. Y mi ta kere cu e mensahe a yega y hende ta papiando. Ban wak y spera cu esnan cu tin cu actua, actua di berdad y cu esey mi kier men, actua di un forma cu berdad ta yuda contribui na e causa. No window dressing ni show pa gana voto y of mustra popular. No tur ora esey ta bon.