Trump ta impone impuesto di importacion di 10% riba Hulanda y otro paisnan pa motibo di Groenland

WASHINGTON - E presidente mericano Trump ta impone un impuesto di importacion di 10 procent riba Hulanda y otro paisnan Europeo pa tur mercancia cu ta exporta pa Merca. El a anuncia esaki riba su plataforma di social media Truth Social. Banda di Hulanda, e medida ta aplica tambe pa Dinamarca, Noruega, Suecia, Francia, Alemania, Reino Unido y Finlandia.

Trump ta bisa cu el a bin cu e medida pasobra e paisnan aki ta participa na un mision di exploracion na Groenland, cu ta sirbi como preparacion pa un entrenamiento di NATO. E siman aki, ministro demisionario Brekelmans a anuncia cu Hulanda ta manda dos militar pa Groenland. Anteriormente e otro paisnan a bisa cu nan tambe lo manda hende.

“E paisnan aki, cu ta hunga e wega hopi peligroso aki, a tuma un riesgo cu no ta sostenible y no ta duradero,” Trump a scirbi. “Pesei, ta absolutamente necesario cu, pa proteccion di paz mundial y seguridad, medida fuerte wordo tuma pa termina e situacion potencialmente peligroso aki rapido y definitivamente.”

E impuesto di importacion di 10 prociento lo drenta na vigor riba 1 di februari y, segun Trump, lo wordo subi na 25 procent riba 1 di juni.