Agencianan di biahe canades ta conseha su ciudadanonan pa no biaha pa Aruba y Corsou

MONTREAL — Personanan di Canada ta reprogramando nan plan pa bishita algun parti di Caribe despues di accion militar i amenaza di Merca. Asina varios portal canades ta raporta. Agencianan di biahe ta bisa cu algun cliente ta evita Aruba y Curacao, dos islanan serca costa di Venezuela, caminda Merca a hasi un ataque militar i a captura su presidente hace mas o menos dos siman. Otro caminda e agencianan mes ta recomenda pa no biaha pa Aruba y Corsou y pa evita Cuba; 

PREOCUPACION

“Ta sigur cu tin preocupacion,” Chris Lynes, director di Flight Centre Travel Group Canada a bisa. “Nos ta mira hende ta cambia destinonan y ta pone su atencion riba Mexico, Jamaica y Dominican Republic.” Algun bajero a pone nan biahenan Caribe on hold of a cancela nan completamente, y awor e temor ta incluso pa Cuba, caminda presidente Mericano Donald Trump tambe a lanza amenaza. Sal Lato, doño di franquicia di Marlin Travel, a bisa cu varios cliente siman pasa a pone nan bishita pa e islanan on hold, pa motibo di ansiedad tocante e region. Grupo di biaheronan riba social media ta haci hopi pregunta tocante seguridad of facilidad di pasa vacacion cerca di Venezuela of na Cuba, un pais cu ta sufri apagones y falta di kuminda, gasolina i medicinan. Hopi hende tin miedo cu situacion por empeora, den particulár pa motibu cu Cuba ta depende di oleo venezolano — un ligamento vital cu Trump a corta hace mas o menos un luna.

CANCELA

“Mi husto a cancela mi ticket y mi ta buscando un otro destino,” un post a bisa riba pagina di Facebook “Curacao Travel Tips.” “E conflicto y e falta di seguridad ta un tiki mas serca pa mi komodo. Hopi desilusionante.”

AGENCIA MES TA ADVERTI

Janet Radley, cu ta traha na St. Clair Travel Agency den Toronto, a bisa cu e la ta advirti hende cu ta buscando un destinacion cu solo, pa evita e riesgo di un bishita na Cuba y ta recomenda cu nan no biaha pa Aruba, Curacao y islanan cerca. “Hende por mira algun di e helicopternan for di beach na Corsou. Esey por ta un tiki molestoso,” e la bisa tocante e atake mericano contra Venezuela mas prome den e luna aki. 

AEROLIÑA SI TA SIGUI BULA

Sinembargo, WestJet, Air Transat y Porter Airlines ta bisa cu tur ta continua negoshi manera normal. Pero Air Canada a saca un advertensia temporario pa biahe pa Venezuela y regionnan den cercania cu ta permiti cambio di vuelo pa 17 aeropuerto.