AFTA: Ley nobo mester reduci tarifa halto pa transacionnan haci cu carchi di pago

ORANJESTAD - A base di su investigacion di mercado encuanto tarifanan pa transaccionnan haci cu carchi di pago, Aruba Fair Trade Authority (AFTA) ta conclui cu tarifanan cu comerciantenan ta paga pa transaccionnan cu ta wordo realisa cu un carchi di pago na Aruba ta hopi halto den comparacion cu tarifanan aplicabel na Union Europeo y Merca. E componente di costo principal di e tarifanan pa transaccionnan haci cu carchi di pago, e asina yama “interchange fee” , ta un comision cu ta wordo determina door di companianan di carchi di pago (VISA y Mastercard) y ta wordo aplica di un manera uniforme door di e banconan. Pa cada transaccion realisa cu un carchi di pago, e interchange fee mester wordo paga door di e banco di e comerciante na e banco di e consumidor. Na Aruba, gran parti di transaccionnan cu carchi di pago ta wordo haci door di turista. Esaki ta nifica cu banconan Arubano ta paga e interchange fee halto mas tanto na banconan den exterior, causando cu aproximadamente Afl. 45 miyon pa aña ta sali for di e economia Arubano.

E investigacion a wordo inicia pa motibo cu AFTA a ricibi indicacionnan cu tarifanan pa transaccionan haci cu carchi di pago a subi. Debi na e cambio di carchinan Maestro pa Mastercard Debit of Visa Debit, e banconan comercial na Aruba a cuminsa cobra comerciantenan, manera tiendanan, restaurantnan y proveedornan di servicio, tarifanan mas halto pa transaccionnan cu ta wordo haci cu un carchi di pago. Roly Sint Jago, presidente di Hunta di directiva di AFTA ta splica cu for di e investigacion ta resulta cu e interchange fee na Aruba ta 6 pa 7 biaha mas halto cu na otro regionnan na unda e interchange fee ta regula. E banconan na Aruba ta incorpora e comision aki den nan tarifanan pa e comerciantenan. E comerciantenan na nan turno ta pasa e gastonan aki pa consumidornan, cu consecuentemente ta paga prijsnan mas halto pa productonan y servicionan. Finalmente e consumidor Arubano ta paga e gastonan di e interchange fee halto. AFTA ta duna algun recomendacion pa yuda reduci e tarifanan pa transaccionnan cu ta wordo haci cu un carchi di pago. E recomendacion principal ta cu Aruba, manera hopi otro region, mester introduci regulacion. Esaki lo establece un limite maximo riba e interchange fee cu ta wordo determina door di e companianan di carchi di pago, y lo yuda limita e fluho di placa pa exterior.

AFTA ta e autoridad independiente y imparcial di Aruba cu ta supervisa e funcionamento corecto di mercadonan. AFTA ta investiga mercadonan na Aruba por medio di, entre otro, solicita informacion, entrevista y bishita di sitio anuncia y no anuncia. AFTA lo tuma accion pa preveni y, ora ta necesario, penalisa conducta anti-competitivo di companianan. Den 2026 AFTA lo cuminsa eherce su tarea legal di proteccion colectivo di derechonan di consumidornan. Pa mas informacion tocante AFTA y e reporte completo, por bishita nos website www.afta.aw.