Minister di husticia mester duna cuenta y rason tocante corupcion den KIA

ORANJESTAD – Si trahado gana miles di florin extra pa luna na negoshi clandestino den prizon esaki ta inaseptabel, René Herde, presidente di fraccion di AVP ta bisa. “Receso of laga, minister di Husticia Arthur Dowers mester responsabilisa su mes.” Lider di oposicion Evelyn Wever-Croes (MEP) tambe ta bisa cu e ta preparando su preguntanan na Staten pa motibo di e noticianan tocante negoshi ilegal den KIA. “Pero mi ta duda si nos lo haña contesta. Pasobra no ta prome be cu nos ta trece abuso den prizon dilanti.”

MERKADO ILEGAL

Recientemente e detenido Johannes Span Ospino i e ex miembro di maneho di prizon Charlene Oduber a conta bieu di e mercado ilegal den prizon. Un grupo di trahado corupto tur luna lo ta gana miles di florin na benta ilegal di droga i telefon.

DOWERS SA DI CORUPCION

Dowers ta bisa cu e sa di e corupcion. Tambe e ta bisa cu e lo ke cambia algo na e situacion. “Si nos no hasi algo awor e situacion aki lo sigui dura largo.” Pero un plan pa trata no tin. Siman pasa ex director di prizon Trudy Hassell, cu a anuncia cu e lo bai pasa un basora den e prizon, a haña su retiro pasobra e no tabata popular serca e trahadonan di KIA.

POLITICONAN TA PREKUPA PA E SITUACION

No solamente ta inaseptabel cu hopi hende ta ganando placa na un manera ilegal, pero tambe ta inaseptabel cu e seguridad di trahadonan di KIA, e detenidonan i na final henter comunidad, ta na peliger”, Herde ta bisa. “Mester tuma accion. Nos ke sa di minister kico e ta bai hasi. Si berdaderamente ta trata di miles di euro, aki no ta trata di un co’i kens sino di negoshi serio.

PORKERIA

Segun ex minister Rudy Croes, e tabata minister di 2001 te 2009, semper tabatin corupcion den prizon. Pero asina extremo manera awor ta pinta e situacion, tin e precupa. “Esaki ta inaseptabel. Actualmente prizon ta un porkeria.

Den su tempo Croes tabatin su trikinan pa duna un trahado menos chens di forma un organisacion ilegal. “Ta importante ora bo tin grupo di trahado cu ta traha warda pa cambia nan regularmente i inespera. I no e team so sino e hendenan den e team tambe. Hende cu tur dia, aña ‘den aña ‘fo ta traha na e mesun departamento ta haña muchu hopi chens pa conspira. T’asina e cos ei ta bai.”

WEVER CROES Y HERDE

Wever-Croes ta duda ku berdaderamente lo trata e ‘situacion inaseptabel’ den prizon. “Asina scandal yega muchu serca di un mandatario, politiconan i Ministerio Publico ta wak otro banda. Ta esei ta e problema. Tin hopi ehempel di esaki. No ta pa hustifica pero no ta straño tampoco cu ambtenaar ta participa na esaki. Pasobra nan ta haña ehempel malo i nan sa cu tog lo no bini un investigacion.” Segun Herde i Wever-Croes ya caba ta formulando e preguntanan pa Staten. Den e prome siman despues di e receso cu ta caba dia 16 di augustus lo pidi minister Dowers pa contesta nan. “Aworaki no tin sentido pa hasi pregunta pasobra tur esnan envolvi ta ku vacacion.”

Autor Jackeliene Geeve pa Ret Caribense, partner di NoticiaCla.com.