Na Corsou tin proposishon pa sanciona benta di cigaria ku esnan bou di 18 aña

WILLEMSTAD.- Algun tempu pasá Konseho Konsultativo (‘Raad van Advies’) a bolbe duna su posishon riba e inisiativa di lei ku a keda entregá na dje riba uso di tabako den komunidat. Di akuerdo ku e lei den su nota di splikashon e ta bisa entre otro ku den un rapòrt dje Instituto di Reino pa Salubridat i Medioambiente ta sali na kla ku lo tin un oumento den e kantidat di hóbennan ku ta hasi uso di sigaria òf ‘vape’. Segun esnan ku a tuma e inisiativa pa kambia e lei na Kòrsou, e rapòrt ariba menshoná no ta referí na e situashon di Kòrsou, pero ta suprayá ku e faktornan aki ta válido pa por tene kuenta ku e uso di sigaria bou di hóbennan i pa baha e tendensia ei i asina protehá e komunidat.

Segun e inisiadónan, intervenshon di gobièrnu ta nesesario pa motibu ku e último añanan tabatin diferente desaroyo riba tereno di humamentu di produktonan di tabako ku ta eksigí pa imponé kontròl i reglanan nobo. Mester bini un grado di konsientisashon mas grandi den komunidat riba e peligernan di humamentu. Entretantu a start ku un kampaña ku partisipashon di CMC, FMA i GMN riba e peliger i konsekuensianan di ‘vape’ riba nos isla, pa motibu ku a nota ku tin un subida den esaki.

RvA ta yuda pensa i ta mustra ku den kombinashon ku sierto areglonan legal lo por alkansá e mesun meta. Por pensa den direkshon di adaptashon di leinan di e.o. televishon kaminda ta pone un prohibishon pa benta di bibida stèrki i tambe sigaria ku menornan di edat, pa no papia mes di droga riba kaya. Di un manera krítiko pero konstruktivo RvA ta bisa ku e ta sinti falta dje esfuerso pa pone kosnan den balansa i puntra ta kiko t’e motibunan eksakto ku ta boga pa un kambio den e lei di uso di tabako na lugá di un kambio di e ‘Warenlandsverordening’ den kombinashon ku e lei di tabako.

Un dje kambionan ku ta ser proponé ta pa prohibí/ sanshoná entrega òf benta di produktonan di tabako òf similar na personanan ku no a alkansá e edat di 18 aña. Pero den kaso di sanshon lo mester wak si no tin di revisá e inisiativa di lei. Pero manera e lei di tabako ta aktualmente no ta posibel pa imponé but/sanshon, loke ta hasi e inisiativa di lei ménos efektivo. NOTA: Texto ta scirbi den papiamento fonetico di Corsou.