Analisis: Pakico situacion di trafico a sali for di man, Parti 2

Scirbi pa Tito Laclé 

E mesun dia cu mi a publica e parti 1 di mi analisis riba e crisis actual di trafico na Aruba, un otro victima a cay a consecuencia di trafico violento. Un turista mericano ta fayece despues cu na fin di aña, cu apenas algun ora na Aruba, a accidenta na man di un chauffeur cu a alcansa e turista riba caminda, y cu no tabatin e corahe di para pa su acto, y a bira un caso mas di hit & run. Por spera sigur otro avalanche di reaccion mediatico (for di Merca) dentro di poco riba e caso aki. Mas mal propaganda pa Aruba. E noticia di e turistananan cu a haya nan morto violento na un hotel local, ya caba ta noticia di dia internacionalmente. Enfin, bida ta sigui, berdad? E echo cu e por bira un otro caso mediatico ‘a la Natalee Holloway’ no ta haci e cos mas malo, toch? Mundo ta sigui lora toch?

Critica so, no ta tur cos. E ta facil pa djis critica. E ta duna un persona e chens pa saca, y ventila su rabia, y despues e ta ok? Un critica mester bin tambe cu un possible solucion, sino tanto bal. Ayera mi a ‘ofrece’ algun pensamento di con lo por cuminsa resolve e problemanan cu tin. Mi no ta pretende di ta experto, pero mi a duna algun sugerencia y caminda pa cana, basa riba loke mi a experencia den e.o. corte y trata cierto casonan y raporta nan, durante mi mas di 35 aña den prensa. 

FALTA LUZ

Un otro problema cu mi ta experencia personalmente a base casi diario, y ayera (basa riba e tantismo reaccion haya di e articulo di ayera) a ripara cu ta hopi mas hende tin e problema, ta e falta di luz riba nos cayanan. Aruba su cayanan ta HOPI scur. Especialmente esnan mas trafica, manera high way, boulevard y otro partinan hopi druk, colma cu hende. Camindanan cu mester tin luz, ta scur. Hopi scur. Consecuencia ta cu anochi, di baina abo (como chauffeur) ta mira e peaton(nan) cu kier (purba) cruza caya. Hopi caminda, unda cu mester tin luz ambos banda di caminda, tin luz solamente un banda di caminda. Mi a compronde cu (y tambe ta  supone) cu ta pa motibo financiero, ta haci esaki. No tin suficiente budget pa pone mas luz. 

DOÑO DI CAMINDA

Y no ta yuda cu cierto peaton(nan) ta kere cu nan ta doño di caminda, y ta pretende cu nan por cruza ora cu nan kier, unda cu nan kier, y (awor e ta bin!!): CU TA E TAREA DI E AUTOMOBILISTA PA AUTOMATICAMENTE SLOW DOWN, pa duna e peaton chens pa cruza. Problema ta cu 1, debi na e scarsedad di luz, di baina e chauffeur por wak e peaton, corda pa e slow down. Y si ta na lugarnan cu mester tin velocidad abou (den ciudad conoci como ‘bebouwde kom’), e chauffeur por para ainda na tempo. Pero e ora, pa su mala suerte, esun su tras, si ta coriendo duro, causando un accidente di cadena, manera ta custumber awendia. Pero, (y esaki ami mes tin experiencia aden), ora cu bo ta riba un highway cu e velocidad ta entre 70 y 80km maximo, tin peaton cu ta risca cruza caya, casi bula dilanti e chauffeur ultimo ora, y ta pretende cu e chauffeur mester hala brake, pasobra e peaton ta doño di caminda toch?  Cuando biaha mi mes a spanta mi alma, ora cu peaton ta aparece mi dilanti. Y manera ami, tin hopi mas. Hera causa desgracia, sin cu tabata nos falta. Y nos no ta core duro, pero,    ora cu bo core e velocidad maximo di 80, y un hende bula bo dilanti, hopi bo no por haci, si luz ta strobabo di wak e peaton. Otro caminda na mundo, ta pone tipo di reflector riba caminda, cu ni si tin luz, por lo menos e caminda ta bon marca. Pero ainda falta e luz. Y ultimo tempo, pa completa e obra, un serie di luz ta kima pa lunanan largo, cu ta crea e situacion ainda mas problematico.

SOLUCION?

Con pa soluciona e problemanan? Ami lo bisa, e placa cu tin cu bay pa asfalta caya, usa parti di esaki pa drecha of aumenta cantidad di poste di luz na lugarnan cu ta hopi frecuenta, of aumenta e forza di luz na e sitio cu tin luz caba. Mas watt? Mas poder? Mas luz? Mi no ta experto, pero logica ta bisami cu algo asina mester ta possible toch? 

Mas ta sigui mayan. Pensa riba e.o. Seguro..