Subsidio di Nederlands Letterenfonds pa promovedor di lesamento

AMSTERDAM – Nederlands Letterenfonds ta pone subsidio disponibel pa organisacionan cu ta desaroya proyecto pa stimula lesamento. Peticionnan por wordo hinca te diabierna 20 februari. E programa ta wordo oferci pa motibo cu lesa ta bahando den nivel, algo cu ta crea un problema social pasobra lesa ta esencial pa participacion den sociedad, desaroyo personal y pa forma pensament critic.

Organisacionan por pidi financiamiento pa diferente actividadnan manera clubnan di lesa, proyecto digital, workshop di escritura creativo, presentacion y actuacion, entrenamiento pa maestro y guia, y otro idea innovador cu ta promove lesa. Den e regla ta reserva minimo dos lugá pa organisacionan Caribe; un proyecto den Papiamento como idioma y un otro den Ingles.

Un ehempel ta Stichting Biblionef, cu a ricibi subsidio anteriormente pa festivalnan di lesa na Aruba, Sint Maarten y Corsou. E proyecto a inclui cuenta den idioma materno y Hulandes, presentacion, workshop, lectura cu autor, y involucracion di mayornan y maestronan den proceso di lesa di mucha. Segun directora Bethzy Gianella Chiang, e subsidio a habri porta pa traha huntu cu partnernan local y a drecha plan concreto cu tin impacto real.

Nederlands Letterenfonds ta duna apoyo na literatura den Hulandes, Fries, Papiamento. E meta ta promove y stimula literatura di bon calidad y diversifica, tanto den Reino Hulandes como internacionalmente.