Operacion na aeropuerto di Aruba practicamente paralisa awemainta

ORANJESTAD – Aeropuerto di Aruba ta den un problema serio for di awe mainta, y buelonan for y pa Aruba a cuminsa cancela caba. Un problema cu un aparato na servicio meteorlogico cu ta suministra avionnan cu informacion crucial di tempo, biento etc, a cay afor awe mainta, cu ta pone cu avionnan falta informacion crucial pa subi y baha na Aruba. Vocero di aeropuerto Hendrik Croes a confirma na NoticiaCla.com cu e situacion ta uno hopi serio y cu no ta descarta cu pa awe merdia, avionnan tur lo por cancela nan buelo.

FAYO DEN APARATO

E consecuencia di e fayo den e aparato ta pone cu sin e informacion aki, e ta trece peliger pa avionnan ya cu e informacionnan crucial ta necesario pa e computer di e avion por calcula nan plan di aterisahe. Y como tal e informacion cu falta, ta dificulta e situacion aki. Mientras cu aerolinanan arubano y di Corsou si ta sigui opera normalmente (te cu awor), companianan aereo mericano ya caba a sea cuminsa cancela nan buelo y of ta menasa di haci esaki. Awe merdia ta bira conoci si e situacion ta drecha of si ta sera aeropuerto te ora cu remedia e situacion aki. Un di e solucionan ta pa usa e servicio di METEO di Corsou, pa suministra aeropuerto di Aruba cu e informacion necesario. Entrevista di NoticiaCla.com cu vocero di aeropuerto Hendrik Croes riba e tema.