Gabinete Pisas a pidi retiro di dos di su ministernan di su gabinete

WILLEMSTAD – E liderato di partido MFK a pidi cu ministro Kimberly Lew-Jen-Tai y ministro plenipotenshario Carlson Manuel pone nan funcionan abou. No ta conoci si ta temporario pero por lo menos un medio ta usa e palabra ey ‘temporariamente’. Ademas esaki tambe ta poni den e comunicado di prensa di MFK, firma pa lider politico Gilmar Pisas y presidente di partido Sithree van Heydoorn.

Segun MFK, Lew-Jen-Tai a pone su tarea abou debido na un situacion personal y familiar. Partido ta bisa cu no lo duna mas informacien riba esaki, pasobra e ta trata di asuntu priva, pero OM a cuminza un investigacion di derecho penal contra dje.

ACUSACIONAN

Den caso di Carlson Manuel tin un otro consideracion.MFK ta referi na acusacionan cu ta circula riba red social, un mocion presenta den Parlamento tocante e mesun asunto, y un investigacion cu Rekenkamer a cuminza tocante e caso conoci manera Cas di Corsou. Pa sigui garantisa transparencia den e investigacion ei, partido a pidi cu Manuel pone su funcion abou temporariamente.

Liderato di partido ta bisa cu nan a cuminza cu procedura pa yena e dos funcionan atrobe.

MFK ta enfatisa cu for di 2020 tin normanan mas estricto pa gobernacion, transparencia y disciplina den partido, y cu e normanan ta ser aplica pareu pa tur hende, sin mira cual posicion nan tin.

Cu e medida ey, MFK ta bisa cu nan ke actua “den un manera pareu y husto” y duna espasio pa investigacion cu cuido, cu e discrecion cu segun partido ta necesario.